جديد .............قصيدة الشاعر الوالد: رشيد بن مساعد في العبودي
<
السلام عليكم ورحمة الله وبركاته هذي قصيدة الوالد: رشيد بن مساعد السهلي إهداء للأخ : بدر بن زيد العبودي الشريف واللي يقراها بيعرف المقصود منها ولكن انا بوضح المعنى باختصار الشاعر له مزرعه في بلدة حراضه والكل عارف الشيء هذا وجاها ما جاء المزارع الثانيه من شح في المياه وعلم بذلك الاخ بدر وقال للشاعر انا ما أعتبر المزرعه الا حلالي بس انتم عزموا وانا بجيب الفرار (الحفار) وبحفر والفلوس لاتشيلون همها عطوني اللي عندكم والباقي بعدين متى ماجاء عندكم وتم حفر بئر عميق والحمدلله وجدوا الماء والمزرعه الحين في افضل حالاتها بفضل الله ثم بفضل بدر العبودي اللي يستاهل أكثر من هالقصيده واتمنى ان تستمتعوا بها
بيــــض الله وجــه ابـوزيد العـبودي=عــد ماهبت ذعــاذيع الشمالي وعدة الاحجار ورمال النفودي=وعد ماتمطر هماليل الخيالي الشلي يشفيك لو نازح جدودي=مثل بدر القرم مدغوش العيالي والردي لوتزهمه مافيه فودي=مايسرك لو رفيق لك موالي الشلي حبل يوردك العدودي=والردي يوصف مثل رمث الحبالي صحبة اهل الطيب ترقابك سنودي=من الوطى ترقيك في روس العوالي والردي لاتصحبه مامنه زودي=مثل ماتبني على جرف هيالي يالهنوف منقضة شقر الجعودي=اطمحي للقرم ياشبه الغزالي للعبودي بدر جعله في الوجودي=جاره الله من صواديف الليالي يوم عطش الحيش وانهارت اجهودي=ارسل الفرار وارخص كل غالي ولا طلب منا نقدم له نقودي=قال جدوا في العمل هذا حلالي باذر المعروف ماني له جحودي=بالثناء نجزاه لاجاء له مجالي ومدحنا له ماتجاوزنا الحدودي=ولاسهجنا حد وافين الخصالي ماهضمنا كل شغموم صمودي=من الخطأ ندرى صناديد الرجالي قصدنا ناس عن الواجب تحودي=في سبيل الخير ماتنفق ريالي القلوب من الحقد والغيض سودي=واليدين قصار والالسن طوالي والمراجل دونها طرق تكودي=ماتهون الابعزم ودفع مالي ولا بكل يدفع المال ويجودي=كود من يسعد بحظ وطيب فالي قاله اللي ماصحب كل معقودي=طمعته صحبة كريمين السبالي وختمها مسك وورد وطيب عودي=وحكمة المعنى لها يرتاح بالي وسلامتكم |
< الله يحييك يابومشل والساعة المباركة اطلالتك الجميلة
صح لسان ابومساعد قصيدة وافية ويستاهل راعي العلوم الوافية ماقيل فيه والله يطرح البركة لبومساعد الغلا مهوب للمزرعة الغلا للمحل والتاريخ وريحة الأجداد في بلدة القلاع حراضة وهي تاريخ للقبابنة جميعا |
< اقتباس:
لاهنت يامساعد على المشاركة بهذه القصيدة الجزلة من شاعر جزل وراوية معروف وراعي الطيب يستاهل الطيب أمثال بدر العبودي ماقصر وبيض الله وجهه وصح لسان أبومساعد ولاهي مستغربة منه فهو سباق لمدح الطيبين ومن لهم مواقف تستحق الثناء والتقدير |
< صج لسانك يابومساعد وسلمت اياديك مساعد على اتحافنا بهذه القصيده ويستاهل الممدوح |
< صح لسانك وعلا شانك يالشاعر رشيد بن مساعد ومشكور الاخ مساعد على طيب المشاركه |
< صح لسان الشاعر
وسلمت يدك اخ مساعد |
< بيض الله وجه الشاعر وصح لسانه ولايهون الممدوح ولو ماهو طيب مامدح وشكرا ياخي مساعد |
< تسلم يمينك ياغالي على النشر وصح لسان الشاعر |
< لاهنت يامساعد وصح لسان الوالد رشيد بن مساعد |
< صح لسانك يالقرم مادح وممدوح وناقل |
< صح لسانك وبيض الله وجهك يابومساعد على جزالة القصيدة |
< يسلمووووو يالغلالا
|
| الساعة الآن 05:22 AM. |
Powered by vBulletin® Version 3.8.7
Copyright ©2000 - 2024, vBulletin Solutions, Inc. Trans by