هذه قصة قديمة وهي من القصص المشهورة والمحزنة وهي قصة خلوج ابن رومي وابن رومي هذا تاجر من أهل الأحساء وعنده منايح من الإبل في حوش وكان له ولد صغير ليس عنده سواه وكان هذا الولد غالياً عليه جداً فجاء الولد الصغير عند الإبل فرمحته إحدى النياق وتوفي فما كان من ابن رومي إلا أن ذبح ولد الناقة التي رمحت ابنه أمامها فأخلجت عليه وظلت تحن حتى نفد شحمها ثم لقحت ثانية وبعدما ولدت ولدها وعرفته ذبحه أمامها وهكذا صار يعاملها ثلاث مرات وفي آخر مرة ماتت بعد ذبح حوارها وقام ابن رومي وشرع في فتح صدرها فوجد الكبد قد ذابت وتفتتت فلما شقوا بطنها وجدوا كبدها يابسة من شدة الحزن .
وهكذا صارت خلوج ابن رومي مضرباً للمثل عند الشعراء ومن ذلك قول الشاعر فهاد بن مسعر العاصمي وقد نزل بالأحساء بسبب الحاجة التي مسته وأبعدته عن قبيلته ولم يكن عنده غير شخص اسمه نصار فأخذ فهاد يخاطبه بالأبيات التالية :ـ
يا ونة ٍ ونيتها يابن نصار=ما ونها مثلي خلوج ابن رومي
كني من الفرقا على كير بيطار=شبوبه ارطاء والستاد مهمومي
صدري كما نجر زعول وجضار=نفسه على مهواه نفس محمومي
من عقب ماني قنب صرت كمبار=سبحان من له في عبيده حكومي
يا وينهم ربعي هل الكيف والكار=اللي عليهم دارجات العلومي
وإلى نزلنا منزل ٍ فيه نوار=ذا مقبل ٍ يمي وهذا يقومي
مزحي عليهم ما يجي فيه تنكار=ما أحد ٍ يبرق في ملاوي علومي
والشاعر محمد العوني يقول في قصيدته المشهورة
خلوج ٍ تجذ القلب بأتلا عوالها=تكسر بعبرات تحطم سلالها
تهيض مفجوع الضمير بحسها=إلى طوحت حسه تزايد هجالها
له قلت أنا يا ناق كفي عن البكا=لا تبحثين النفس عما جرى لها
لا تفجعين البال بالله هودي=ولي خلوج ٍ خبث البين بالها
تبكين فرقا بكرة ٍ شدة العرب=ضاعت يمين البوش وإلا شمالها
تجيك يا ناق الخطا أو تجينها=وإن كان ضاعت لك بديل ٍ بدالها
لكن أنا اليوم ما تنعد مصاوبي=ولا علتي تبرا ولا ينشكى لها
فلو البكا يا ناق عني يحلها=بكيت بيض أيامها مع ليالها
ولو البكا يا ناق يرجع لغايب=بكيت لين العين ييبس ثمالها
وأبكي على الإثنين ما ذعذع الهواء=مدى الدهر لين النفس تلحق زوالها
وأبكي على ما صاب نفسي وما جرى=وأبكي على فتخان الأيدي زلالها
وأبكي على دار ربينا بربعها=معلوم خشم الرعن من شمالها
ومن شرق طعسين الأرخم تحدها=بين اللوى والسر ما أطيب سهالها
دار بنجد جنة كان قبل ذا=ومن صكته غبر الليالي عنا لها
وصفه من الخفرات بيضا عفيفة=يفوق كل البيض باهر جمالها
حسودها يغضي إلى مر حولها=من خوف عيال ٍ تربوا بجالها
هي أمنا واحلو مطعوم درها=غدتنا وربتنا وحنا عيالها
بزور بنا ما مثلها يكرم الضنا=وصول بنا لكن نسينا وصالها
تلقي علينا الجوخ والشال فوقنا=وهي عاريه تبكي ولا أحد ٍ بكى لها
ولا أحد ٍ جزع من صيحته يوم سبلت=ولا أحد ٍ نشد من بعد ذا وش جرى لها
قلت آه واويلاه يا خيبة الرجا=كيف أمنا تهضم وحنا قبالها
يا طارش ٍ من فوق سراقة الوطا=هميم إلى سارت ذعرها ظلالها
حابل ثمان اسنين ما مس خلفها=ولا بركت للشيل جملة حمالها
إلى بدالي لازم ٍ قلت شدها=واضبط عن الفزات مقضب حبالها
ولا نعتني بالخرج ماذي بحزته=شل قربة ٍ واجعل زهابك عدالها
فإلى شلت خذلي بالرسن قدر ساعة=أبلغك في دق المسايل جلالها
وإلى ختمته بالسلام فحثها=من دار (ابو جابر) سقى الغيث جالها
أوصيك يا مرسال بالسير والسري=واحذرك نوم الليل عينك ينالها
إلى سرتها عشر وخمس مغرب=مرواحك (الشام ) منها منالها
وإلى جيت (سوق العصر ) ياتيك غلمه=تخثع بزينات البريسم إنعالها
يقولون لك ياصاح عطنا علومك=بلدان نجد ٍ عقبنا وش جرى لها
قل كل بلدان القصيم وغيرها=عن الخوف زاموا دون جاله رجالها
مير داركم من عقبكم تندب الثرى=تبكي على الماضين واعزتالها
لعبوا بها الأجناب لا رحم حيّكم=والبيض بالبلدان شتت لجالها
شيابكم تضرب على غير موجب=من عقب كبر الجاه تنتف سبالها
أولاد علي اليوم ذا وقت نفعكم=لا رحم أبو نفس ٍ تتاجر بمالها
أولاد علي إن الليالي قصيرة=ولا للفتى غير الثناء من نوالها
أولاد علي اليوم ما هوب باكر=قوموا بعزم الليث ماضي فعالها
لا تتبعون الهون والعجز والعسى=أو ربما أو ليت يعتب سوالها
جود ورجا يا نا س ما هيب عندكم=هذيك ما لحقو هل القول جالها
وذي قالة ٍ ما ينطحه كود نادر=أولاد علي من بكم قال أنا لها
ترى مركب الأخطار هو مصعد العلى=ولا يدرك المقصود غير إحتمالها
وترى بالسيوف المال والعز والبقا=والجنه الخضراء بخضرة إظلالها
قومو برأي الله واقضوا ديونكم=أنتم هل القالات ما أنتم رذالها
وإلى أن يحين لنا الموعد مع سالفة وقصيدة أخرى تقبلوا تحياتي
ودمتم برعاية رب العزة والجلال
العرض المتطور
