استريحي يالاماني ما بقى شي(ن) مفيد=بح صوتي بس انادي و الإجابه في صداه
استري عورة دموعي لحتوتني من جديد=لا خذت فرحة عيوني و اتركت لي قولة (آه)
اتأمل وضع ناسي بينهم وضعي زهيد=كل منهم له مرايه تعكس احوالي معاه
و كل منهم له حكايه وقعها فيني شديد=هم (ثلاثه) في حياتي كل منهم له غلاه
كل منهم في ظميري يصنع العقد الفريد=حلة(ن) ببهى المعاني شلتها لآخر مداه
شلتها بأقصى فؤادي من وريد و في وريد=احتظنها بسم قلبي و اتباها في ولاه
دارت الأيام فينا و انقضى الراي السديد=وكل واحد بان زيفه وارتسم واقع سماه
واحد(ن) قرر يمالي صاحب (الفكر البليد)=رغم ترديد الحكاوي حول مستقبل عطاه
رغمها و رغمي تغيّر واصبح بقوله يشيد=عقب ماكان بحضوره يلعن بقلبه ثواه
استشف بصوته اني اعشق اسلوب الجحيد=من سنة جدي و حالي ذيب يتسلى برعاه
صدقه قبل يتأكد هو على اليمه اكيد!=وانتهى مع من تمنى يرتشف من ريق ماه
و ثاني اصحابي طلبني ساعة الحظ السعيد=انتخابي ثم لقابي العصى اللي ما تعصاه
كنت اشيله بالخطايا و استره دون العبيد=ادفن (افعاله) و اغني ربما يعرف خطاه
ربما يصحوا باليل يشتكي برد الجليد=يرتجي بالوصل دفئاً به يماري من جفاه
لكن احواله كما هي كل ماله بي يزيد=لين فاق الطيش حده ولا بقى لصبر جاه
و لا بقى فيني سوى اني اغفر الزله واعيد=دامها الدنيا تمني خل كل(ن) في هواه
و (آخر) اصحابي كتبني في إطاراته قصيد=ينتشيني بكل فكره لا طرى له ما طراه
يتخذني له وسيله في سما جوه بريد=لجل يستوفي حضوره في ملاقى مبتغاه
لجل توصل له معاني يدخر منها رصيد=لا نما للحب لحظه اعتلاها من صباه
ينتعش لا جاد وضعه و اطرب افعاله نشيد=و كل من حوله تمايل و ارتخى للي نواه
هكذا تبقى (الحقايق) لو بدت في ثوب عيد=لو تغلف بالكمال و ترتدي زاهي حلاه
هكذا تبقى و تبقى بين (عبدالله) و ( زيد)=بين ناس ترتدينا لاسود الدنيا عباه
تحتوينا لجل حلم(ن) في هواها ما يحيد=بعثر اوراق اكتماله و اكتفى باللي قراه
حلمها اللي بالخناجر فاح بانفاس الحديد=و التقى بالكذب فنه يالله اني في حجاه
وانكشف لي كل علم(ن) كان بحضوره عنيد=كان يستمتع و يرسم كذبته باعلى فضاه
لين صارت لي (حكاوي) تجبر الوقت العتيد=يحتفل بي من عطاها بين ضحك و بين (آه)
والاماني هي اماني ما بها شي(ن) مفيد=بح صوتي بس انادي و لا سمعت الا صداه
مساعد القباني
العرض المتطور
