هذه القصيدة للشاعر الكبير / دسمان بن مناحي المحمدي السبيعي
أبـدا بذكـر الله رفـيـع المقـامـي = هو السلام ومنـه يبـداء السلامـي
المقتـدر محيـي هميـد العظـامـي= وبشايته تصوير الأنفـس والأجسـاد
المطلـع عـلام مـافـي الخفـايـا=وعن خاينة الأعيـن وسـر النوايـا
رب الفلق محصـي جمـوع البرايـا =جميع مافـي الكـون عنـده بتعـداد
إلهنـا اللـي مالنـا غـيـرة إلــه = معبودنـا ماغيـرة احــدٍ عبـدنـاه
كـل الآمـال معلـقـاتٍ بـرجـواه = حنـا عبيـدٍ لـه اركـوع وسجـود
سامع دبيب النمـل فـوق الحيـودي= فوق الحيود السود والنمـل سـودي
في ليلـةٍ سـوداء عربهـا رقـودي = الا خطـيـبٍ ضـاريـا بالتهـجـاد
اللي فتـق سبـع السمـاوات فتقـا = من بعد ماكانت علـى الارض رتقـا
يالله عسانـا مـن بلاويتـك عتـقـا = في ساعةٍ يكثر بهـا عـض الأنجـاد
ياحـي ياقيـوم ياعـالـم الغـيـب = ياواقـي العثـرة وياساتـر العـيـب
تلطف بمن سالك ومن جودك تجيـب = انت الذي بامـرك تصاريـف الأنـواد
يافالـق الحبـة ويارافـع الطـيـر = يامنزل الماء مـن مـزونٍ مزابيـر
ياخير من يجزي هل الخيـر بالخيـر =ياباعث الإنسان مـن تحـت الالحـاد
ياخالـق الجنـة وياخالـق الـنـار = للجنـة ابــرارٍ وللـنـار فـجـار
ميـزان عـدلٍ وكـل شـيٍ بمقـدار =منـك الطغـاة مقرنيـنٍ بالاصـفـاد
يامهلـكٍ فرعـون يامهلـكٍ عــاد = يامهلك اللي جابـوا الصخـر بالـواد
انت لهـم يـوم الملاقـى بمرصـاد =وبالريح دمرت إيرامـا ذات الاعمـاد
مجري سفينة نـوح فـوق الطوفـان = اللـي عليهـا أثنـان مـن جـوزان
ارست على الجودي وكان الذي كـان = في حكمة اللي عالمٍ غيـب الارصـاد
يامقـدر الآجـال ياعـالـم الـحـال = حنا تحت رحمتك فـي يـوم الاهـوال
فـي يـوم لاينفـع بنيـنٍ ولا مـال = يكـود مـن قلبـه سليـمٍ وعـبـاد
عبـاد لـلـي يعـلـم الكايانـاتـي = يرجـي ثـواب منـزل المحكمـاتـي
ايـآت حـق وكلـهـن معجـزاتـي = ترتيلهن يغني عـن الشـرب والـزاد
باسمك بدينا القـاف وإبـك استعنـا= ولا قـط فـي غـرات مسلـم طعنـا
ولا نتبـع المقفـي ليـا صـد عنـا = تبـت يـد اللـي للمقفيـن نـشـاد
من بعـد ذا عنـدي بمجـد القبيلـة = نـوادرٍ مـاهـي عليـنـا دخيـلـه
يكفي عـن الهـرج المطـول قليلـة = ان مانقص هرجي عن الصدق ما زاد
حنـا سبيـع مطوعيـن الخصومـي = وحنـا سبيـع مورديـن السهومـي
وحنا سبيـع اللـي سعدنـا يقومـي = ينهـض سعدنـا لاتـردن الاسـعـاد
سبعان لاقالوا علـى الخيـل سبعـان = من ماضي الدنيا هل سنـان وعنـان
نمشي بقو الزنـد والسيـف شامـان = ريف القصيـر وللعـدا سـم الاكبـاد
يامـا خذينـا مـن حفيـفٍ قلاعـه = لا طار عـن وجـه المزيـن قناعـه
يسوقنـا زود الدجـر والشجـاعـه = يامـا كسبناهـا صبـاحٍ ومهـجـاد
حنـا ليـا مـنـا نويـنـا بـعـدوة =مانجعـل الدخـان للنصـر قــدوة
كـلٍ نسوقـة ليـن نقصيـة مـدوة = نتعب ظهـور الخيـل ونطـول المـاد
كـم خايـعٍ قفـرٍ نجيـة ونعـسـة = وكـم طارفـة قـومٍ قلعنـا مرسـة
يبطـي وهـو منـا صوابـه بنسـة = لاذاق منـا ملحـة الحـرب ماعـاد
سقم الخصـوم مبعديـن المشاحـي =مرويـن حـد مكعبـات الرمـاحـي
كسابـة الطالـه نهـار الصيـاحـي = واليا عطينا الوعـد نوفـي بالأوعـاد
دواسة الجمـع المناحـر ليـا هيـب = بالخيـل والسلـة وسـردٍ محاديـب
ومذلقـاتٍ يوسـعـن المضـاريـب= والجبخـان وضـرب صلفيـن الاولاد
نبيـد جمـع معسكـرات السـرايـا= ونشوش فـوق المكرمـات السبايـا
لا غردن بالصـوت بيـض الصبايـا = نفضا الجموع لعين مركـوز الانهـاد
تلمنـا الغلبـا وحنـا قبايـل قبايـلٍ = يـــذري ذراهـــا قـبـايــل
من طيبهم طالـوا علـى كـل طايـل =ساس المعرفـة والمـروة والامجـاد
مانقطع السافـه ولا ناكـل السـور = ولا نذبح الغافـل ولا نشهـد الـزور
ولا ننقـل النمـه ولا نجحـد النـور =ولانوقت الساعـة لغـرات الأجـواد
حنا هـل الشيمـة بعيديـن الأنظـار = مانزعل العانـي ولا نزعـل الجـار
ليا هفـت ملـة قصيريـن الاشبـار =انفوسنـا ماهـي دنيـات و ازهـاد
حنا هـل الـردات لا صـاح صايـح =ليـا غـدت جـرد السبايـا سبايـح
كسابـة الطالـه نـهـار المـدايـح =نرجع ونسقي خصمنا كاس الامـرار
نمشي مع البيرق عضـود الامامـي= شرقٍ وغرب وفي جنـوبٍ وشامـي
بياعـة الارواح يــوم الزحـامـي =قـومٍ علـى حرابنـا علـة فــؤاد
تشهد لنا البيداء ويشهد لنـا الجيـش =وصنع اليهـود معكفـات النواتيـش
وسيوف هندٍ فـي يديـن المداغيـش = تشهد لنـا نطاقـة الصـاد والضـاد
ناطا الحما في شف سحـج الخلايـا = جـرد الرقـاب مبـعـدات الهـوايـا
وإن قامـت الإعـداء علينـا حمايـا = ندوس غبـات الخطـر جـد وعنـاد
نفرح بفنجـال المبـارز ليـا سيـق = لو كان هو صعـبٍ ومـرٍ ليـا ذيـق
ويفرح بنا المضهود في ساعة الضيق =نبـوج عنـه الظلـم والنـور ينقـاد
دخيلنـا يامـن وتـامـن جــواده = عـامٍ وشهريـنٍ وعشـرٍ زيــادة
نفرض علـى طلابتـة فـرض إراده = وحنا لمـن يلجـا لنـا كـن وبـراد
تأمن بنا حنـا الشعـاف المصاغيـر =نرعا بها في الخوف وقت المخاضيـر
ونضمى بها في نازحـات المصاديـر =واللي يبينا لا عـرف وسمنـا حـاد
احسـن محـلٍ فالجزيـرة خذيـنـاه = بمثمـرٍ لا صـادم العظـم يشـظـاه
من فـوق حيـلٍ للمطـارد مضـراه = ويدرى خطرنا اللي ورى حد الاكـراد
حنا هـل الوديـان واهـل الجهامـة = وعرقٍ حمينا فيـة بيـض النعامـه
وايضا خذينا عصـب نجـد وسنامـه = ولا جاء لنا الا عقب غـارات وطـراد
خذنا من العارض ليا جـو عوجـان =بالسيـف ماجتنـا بتسليـم الاثمـان
دارٍ لهزعـات المراقيـب مقـطـان =تسمن بها شيـب القـرا قبـل الأذواد
زحنـا صناديـد الأشاويـس عنهـا = بمشـوكٍ كـن السحايـب دخنـهـا
حتـى ثنينـا فـي يدينـا رسنـهـا = مـن فضـل ربٍ للمخاليـق جــواد
كـم ضربـةٍ منـا تفـج التـرايـب= وكم ذود مصـلاحٍ نجيبـة غصايـب
وكم مربـع سقنـا عليـه الركايـب =يلقى لها مع صحصح الخبت مرجـاد
واليـا غزونـا ناقلـيـن البـواريـد = يبغون حلـوات اللبـن شمـخ القيـد
هـذاك يـومٍ عندنـا كنـه العـيـد = يوم التشابـك عندنـا مثـل الأعيـاد
نفـرح بهـم فرحـة قريـبٍ بقربـه = ليـا تحـلا ديرتـة عقـب غـربـه
وإنفك له من شوف الاقـراب كربـه = ومحققٍ فـي غربتـه كـل مـا راد
نذبـح مذربهـم ونلـثـم شبـاهـم =ويطيـح بيرقهـم ويظلـم سمـاهـم
ونحطهـم عبـرة لـقـومٍ وراهــم =يمسون فوق كبودهـم مثـل الأوتـاد
ناخذ على الخيل الأصايـل عجاريـف = بالرمح والمزروع والدرع والسيـف
نولـف إفـراقٍ ونفـرق موالـيـف = وحرابنـا تقطـع هجومـة والامـداد
كـم واحـدٍ ينقـل علينـا ضغيـنـه = طويـلٍ لسانـه قصـيـره يميـنـه
فـي كـل سبـل المرجلـه غابنينـه= في خشمة خطامٍ وفـي رجلـه قيـاد
نرفع كرامتنـا عـن الهـرج لا راب = ولا نندفع في ساقة النجـم لا غـاب
ولا ندعي وسط المجالـس بلأكـذاب = للخيـر حصـادٍ وللـشـر حـصـاد
مانستمـع لمحرفـيـن السـوالـف =هـذارة المجلـس وجيـة المكالـف
اللي لهـا أعـراض الأوادم معالـف = ولا همنا مغـرض ولا قـول حسـاد
هـاذي مزايانـا وهــذا فخـرنـا = سوٍ على صـف المحـارب خطرنـا
ننـزل اديـار خصامنـا مـع ديرنـا =بمصقـلٍ ينـزل علـى المتـن قـداد
عديـت فعـل مخرقيـن الطوابـيـر = مخضبـة حـدب السيـوف البواتيـر
إن فرحوا الصدقان خير علـى خيـر = وإن كضمت خطر هل الغيض وشعـاد
موجز وفي بعض العلـوم اختصرنـا = ديـرة هدماناهـا وديـرة عمـرنـا
بيـضٍ صحايفنـا بعـيـدٍ نظـرنـا = علـم عليـه الله والأجـواد شـهـاد
من دون نقصٍ فـي حقـوق القبايـل =ومصـادم الدنيـا بخفخـاف وزنـاد
قبايـلٍ فـوق الجـزيـرة مقيـمـة= ولهـم تواريـخٍ وقيمـة وشيـمـة
تقاسمـوا ثـم ارتضـوا بالقسيمـة = ومن جاد حظه مع ظروف الدهر جاد
قبايـلٍ محـدٍ يقـف فـي نصـدهـا =جبـعٍ محازمهـا كثـيـرٍ عـددهـا
توعد وتوفي فـي المواقـف وعدهـا = امجادهـم تذكـر قديمـات وجــداد
ذكرتهم مـن دون عـدٍ وتخصيـص = أخاف من هرجٍ يحـي فيـه تنقيـص
للعلـم بـاب وللخطايـا قوانـيـص = وانـا عـن الزلـه أحـب التـركـاد
والحضر صافين القلـوب المشاكيـل = سمٍ تغلغـل فـي القلـوب المغاليـل
تسمـع بناديهـم للأذكـار تهلـيـل =أهل سفرةٍ تنـدل وأهـل بـن وقنـاد
للمعرفـة والخيـر فيهـم مــواري = رجالهم في بـذل الإحسـان ضـاري
حديـث مسلـم عندهـم والبخـاري =والنصح منهجهم والإفتاء والارشـاد
واليوم في نعمـة وحكـم السعـودي = والراية الخضـرا بـراس العمـودي
والعود يكسر في عيـون الحسـودي = أمنٍ وأمـان ونعمـة وأكـل ورقـاد
كـل تحـت فيـة علمهـم يفـلـي =حج الجمل وأنكـف وصـل المصلـي
وتبدلـت كـوخ الكـواويـخ زلــي = وعاشوا بظل الأمـن والخيـر يـزداد
شعـبٍ جعلنـا الله للأسـلام خـدام=وأظهر لتصريف أمرنـا خيـر ألأنـام
إختارهـم رب السـمـاوات حـكـام = واموا شتات الشعب عقـب التشـراد
راحت عصور الظلم مع فايـتٍ فـات = والسلب في أيام الجهـل والقوامـات
والشرك وأنـواع البـدع والخرافـات = وتوقفـت عنـا قواميـس الألـحـاد
فضلٍ مـن المولـى عزيـز الجـلالا = ثـم السعـود مخضبيـن الـسـلالا
كواكـبٍ فـوق الجـزيـرة تــلالا = خير علـى الخيـر وضـدٍ للأضـداد
مدوا حبـال الأمـن فـي كـل ديـرة = واستأصلوا عنـا الخيـوط الشريـرة
يفخر بهـم سكـان شبـه الجزيـره = سادوا على من قبلهم كانـوا أسيـاد
حطوا لهم في عاليـة نجـد حجـري =في الف ومية وسبعه وخمسين هجري
بشلفـاء ومصقـولٍ وبـنٍ ونجـري = وعلمٍ ودين وضرب مسقوف وشـداد
ومـن ذلـك التاريـخ لليـوم حكـام =ومواكبيـنٍ سبـق الـركـب قــدام
شرٍ على الظالـم ونصـرٍ للأسـلام = بذالـه المعـروف خطـلان الآيــاد
ترجمت فحوى الهاجس اللي طرالـي = مثلي مثل غيـري وجالـي مجالـي
لا نيـب انـا الأول ولا نيـب تالـي =لي مع ورود المـاء مقامـا وميـراد
عبرت عن مافـي ضميـري يجولـي =ومـوثـقٍ بالمستـنـدات قـولــي
قولٍ على حسـب الثقـة والأصولـي = متحفـظٍ مـن كـل شاعـر وقصـاد
مثايلٍ تبقـى علـى طـول الأزمـان = يعرف لها من بين الأشعـار عنـوان
ابغى ليا من قيـل وشقـال دسمـان = أرضيـك ياللـي للشعاعيـر نـقـاد
اقولـهـا مانـيـب أدور عـطـايـا = ولا أبغى من التاجر فلـوس وهدايـا
ولا أرجي مـن العالـم كفيـة بلايـا = محدٍ يريـد ووالـي العـرش مـارد
هذي عدد وقفاتها أربـع ميـة بيـت= خصيص في مجد القبيلـة ولا أوفيـت
وعلى محمد سيـد الرسـل صليـت = المستقيـم الناصـح المرشـد الهـاد
أزكـى صـلاةٍ عـد ماهـل همـال = وماغرد القمري على روس الأقـذال
على الشفيع بيـوم تقسيـم الأعمـال= اللـي يصلـي والمخاليـق هـجـاد
العرض العادي
