المملكة ماهيب مصدر للإرهاب *** ماهيب مصدر للعلوم الرديه
ياكثر ماشفنا رديين وكلاب *** تنبح وتذبح في الليالي الجليه
مذهب تطرف ياعرب ماله اسباب *** وتفتح له الأبواب ناسً غبيه
وش ذنب ناسً نزلة تحت الأنصاب *** جاها بلاها من يدين شقيه
وحنا سعوديين يوم الردى هاب *** نار وحياض الموت حوض المنيه
واللي غزانا بالتطرف والإرهاب *** نرميه بمشوك بعيدً مديه
نرميه بمشوك مذبذب وضرّاب *** ضرّاب هامات الرجال الدنيه
وليا ركدنا فوق خده ومنصاب *** مضرابنا في الراس تسمع دويه
في الجو طياره وفي الأرض دباب *** ويم البحر قوات سفنً قويه
من دون مكة تجلب الروح بتراب *** ومن دون طيبه ياهني المنيه
ربي وهبنا العز والرب وهاب *** وأهل الفتن تقرص بأنياب سمّيه
يارب تنسف كل من كان حرّاب *** بديارنا يارب تمحي وطيه
وماضاع حق ومن ورى الحق طلاّب *** ماضاع حقّ عند رب البريه
الشاعر / فلاح أبن كايد القباني