أحن لك .. وأجيك .. ملهوف لـ اللم ..

--------------------------------------------------------------------------------

قبل الغرام وقبل مااصير .. مغليك .... أعاهدك مااقول: غير (آمر وسم)
حتى لو إنك قلت: بأرحــل وأخليك .... بأقول لك: تـامر على ماتبي .. تـم
رايح أكون إنسـان .. يفهم مباديك .... أشـاركك بالضحك والحزن والهـم
مهـتم بك وأغـلي بعد من يخــاويك .... ومـن لايهــمك مــاني بـ فيه مهتم
بأفـتح لك بصدري وقــلبي شبابيك .... وأنقش غرامك وأرسمه داخل الدم
وإن جاك نوم رموش عيني تغطيك .... غمض عيونك وسط عيني وثم نم
وان قلت لي وش كبر حبي بخافيك .... أقول أحبك .. بس .. مدري أنا كم
أبيك تسرقني .. لروعة مراسيك .... وأموت بك موتة غريق ٍ .. وسط يم
أبيك تدرك يوم انا جيت أماشيك .... قصدي تكون أقرب من الخال والعم
قصدي تبعثرني اليا مر طاريك .... وأحن لك .. وأجيك .. ملهوف لـ اللم
قصدي أعشقك وأتمناك وأرجيك .... وأشفق على شوفك وضحكك مع الضم
وأضيع في شعرك .. ودافي أياديك .... وأذوب بالوانك .. وروجك على الفم
أبيك تفهم ..!! يمكن أقبل تماديك .... وأسامحك لااخطيت .. وأقول: ماهم
لكن ..!! لو إنك قلت : بأرحل وأخليك .... بأقول لك أبشر على ماتبي .. تم