( حنا بني قبان والاصل سبعان ) قصيدة جديدة لعبدالله بن فايز القباني

هذه قصيدة جديدة للشاعر الكبير عبدالله بن فايز ال غليظ القباني في مدح القبابنة وذكر بعض أمجادهم

يقول من يبدع صعيبات الالحان = ويازن معاني مايلات القوافي
حنا بني قبان والاصل سبعان = جيناك من رنية بفعل ٍ يشافي
قبيلة ٍ تنسب إلى أصل عدنان= ماهي على بعض القبايل تضافي
زعب ٍ زبنا يوم زوغات الاذهان =ودونه وقفنا وقفة ٍ باعترافي
جانا الشريف بغارة ٍ مثل كثبان = مثل الدبا الكتفان لاجاك لافي
في روضة الصوان خيل ٍ وفرسان = نصدها لعيون بيض ٍ عفافي
وخشم الضنك غشاه عج ٍٍٍٍ ودخان = خيل ٍ مدابير ٍ وخيل ٍ ملافي
سحابة ٍ درسم رعدها مسيان =براقها يفجع قلوب الولافي
هتانها ضرب الثميدي والاكوان = نارد حياض الموت لو هي عيافي
لا صاح في الميدان يالاد قبان =الموت أخير من الردى والتجافي
ولحقت حمايانا سهول ٍ وسبعان = وحمي الوطيس وجنّبونا عيافي
سبعة جموع ٍ هاجمونا بحسبان = راحوا شتات ٍ جعلهم لذّلافي
في الصبح ميدان ٍ وفي العصر نيشان =حرب ٍ ضروس ٍ شيّبت بالخفافي
منا ومنهـم يشبع الذيب سرحان =ا فيه لا رحمة ولا به اسعافي
من طاح تشلاه الحنادي وعقبان =واللي طمع فينا لزوم ٍ يعافي
حنا وقفنا وقفة ٍ ترفع الشان =دون الدخيل ودون بنت السنافي
ودون الحصان اللي يقوّد بالارسان =لاثار في روس الرجال الزعافي
بحدب ٍ تشيل الراس من فوق الامتان =يوم ٍ ولد اللاش منها يخافي
وشلف ٍ مضاربهن عميقات ومكان =ن صنع داوود ٍ عراض ٍ رهافي
لاناب لا نخطي ولاناب عيان =ولاناب نتركها ونعطي مقافي
لامن لفانا الضيف نذبح له الضان =وكبار الفقار ولا نريد العجافي
حنا عيال مطوعة كل غلطان =ولا عض في عرض السنام الظلافي
للخيل ميدان ٍ وللحرب شجعان =ولاجا الملاقا دون حم الشعافي
لاصاح صياح الضحى عند الاضعان =وين الشجاع اللي فعوله تشافي
نبيع غالي الروح بأقل الاثمان =على بنات الريح والكيل وافي
نرسي كما يرسي على القاع برزان =ما زعزعنه ذاريات السوافي
عندي من الآثار لطمة وسعفان =يوم ٍ كل ٍ في حلاله يحافي
بأيمان ربع ٍ لاحضر كل شيطان =لاجت جموع القوم مثل الطوافي
ردوا علي إن كنت في القول غلطان =ياهل القلوب الطيبات النظافي
وإلا الردي خلوه من غير حقران =لاهوب لا وافي ولاهوب هافي
واليوم كل ٍ في حما صقور الاوطان =آل السعود ولا علينا خلافي