لا والله إلا علقـونـا الهوامـيـر=يامحللين السـوق طـاح القناعـي
رحنا ماراح مقيط في جمـة البيـر=ولاعاد تنفعنـا جميـع المساعـي
ماهـو كـلام محلليـن وسماسيـر=عيني تشوف وعين غيري تراعـي
السـوق ماتحكـم عليـه التقاريـر=بيدين راعيـن التـرف والمتاعـي
على الوصايـا ياخـذون الدنانيـر=شباع منا ومـن الاسهـم شباعـي
حتى الوصايا كل ابوهـا خوابيـر=تشري بنادك والعرب في المراعي
حتى البنوك امست سواة المناشيـر=فالمشترى ساعي وفالبيـع ساعـي
وحنا مع الهامور ونغيـر ونذيـر=نوب انخفاض ونوب نوب ارتفاعي
يرقى بنا سهميـن لا طـوّل السيـر=وينزل بنا عشرين من دون داعـي
واليا دخلنا في الصناعـة طوابيـر=السـوق رشـه واتجـه للزراعـي
وإليا حدث زلزال في وسط كشمير=والا اهتوش في نجد راعي وراعي
ولا منيـره طلقوهـا مـن منيـر=ولا دعس حمـدان ناقـة شجاعـي
بكرة تشوف السوق نازل على خير=اللي شرى يقعد ومن بـاع باعـي
وانا على الشاشة عيونـي مطاييـر=لا ذي ولا الاخرى وثانيً كراعـي
واول ما اخذت القسط فرحان ومغير=مع السلف حطيتها فـي الجماعـي
وعلى جهازي والمكاسـب فواتيـر=والمكسب الاخـر تكسّـر خناعـي
ولا شلّع الهامور والنـاس تتطيـر=مع الـذي روّح ودفعـه رباعـي
وقتي مابين إلغـا ومابيـن تغييـر=والناس تجن ارباحهـا فالرفاعـي
واليوم تلعب بي همـوم وتفاكيـر=ومن عقبهم ماعاد انـا بأجتماعـي
ويالله انـا طالبـك رزقً بتيسيـر=مالي ومال اهل السهر والصداعـي
وترى الحقيقة يالوجيـه المسافيـر=اقولهـا والـيـوم زاد اقتنـاعـي
سوقً بلاهامور من دون تقصيـر=ماهـو بسـوقً لوبلدنـا صناعـي
لكننـا نبغـى علامـة وتحـذيـر=لاسجلوا عنـد الخـروج الوداعـي
مشعل الحريص