ياليت أبويه ماورث لي ملايين
ولا قصور فاخرة وسط جدة
ولا عماير شاهقه في الميادين
تسكن شعوب الأرض عد وعده
وفنادق محجوزة للسلاطين
لا جاء نهار فيه حده ورده
ومعارض مايدخلوها الفقيرين
أقل موتر فوق مليون حده
وبواخر تبحر بشتى البلادين
لأعتى البضايع دايم مستعدة
ولا أراضي عمرت بالبساتين
من كل نوع ونوع فيها تعده
عايش ثري ماأجالس إلا ثريين
عيال نعمه ماسرحوا للمكده
عيال نعمه أكلهم بس بتقنين
برستيج أكابر مايتعدون حده
الواحد منهم كل جسمه فيتامين
في مشيته لا من مشى تقل زبده
ما دهن خدوده بعلبة فزالين
ولا غمس شابورته بالميرنده
ولا قبل بوجهه على أبو ريالين
المملكة والفيصلية تسده
مايعرف القطة وغسل المواعين
في شقة عزوب يسوون كبده
أو رز مزه مع دجاج الأخوين
في بيت شوايه بحي العبنده
ماصلح الشاهي بغوري بلاتين
ماقدم القهوة ولا مد فرده
الصبح نايم لين يحين الطفيلين
والليل سهرة للحياة المعده
في قصر شامخ مادهلوه المساكين
ما وقفوا طلابة الدين عنده
عيشة خيال بجوار ناس غنيين
مرت علي في ساعة قبل مده
هذي أمنياتي والحلم دايم زين
حلم وجاني فوق ذيك المخده
وإلا الحقيقة وين أنا والغنى وين
فقري وبن فقري لبكره وبعده
محمد القباني
العرض الشجري