بمناسبة إفتتاح منتدى الوسمي
فهذه قصيدة لشاعر التوباد / سعد بن ثلاب القباني عن الوسمي
أرجوا ان تستمتعوا بقرائتها
يا هبوب الوسم هبِّي بالبـــرادي =مـا وراك من الهواء لا تذخرينه
كود نسناس الهوا يحيي فـــوادي=تفرح عيوني عقب ما هي حزينه
لا انشغل قلب الفتى حرم الرقـادي =عزتي للي تعنَّى في سنينــــه
في سواد الليل للذيب اجتـــلادي=ومن لقى له حاجةٍ تروب عينــه
الله اللي يرزقك من كـــل زادي =وما كتب للعبد في عالي جبينــه
من قلبٍ ضاق من شوف البـلاوي= ما يبي صوت البواري والمكينــه
صجَّوا اذني بالمسجّل والــروادي =والعراوي في السكك تسمع حنينــه
في الضحى في راس الأشقر صرت بادي=يوم قلبي ما قدرت اكتم ونينـــه
ما حلا شوف الشجر في كـل وادي=وكل شِعبٍ مع مسيله حادرينـــه
ما تشوف إلا الرقيطي والســوادي =والحجل مع كل ريعٍ شايفينـــه
ذي عطايا الله تو ثرهــا جـدادي=والفحل خلف البيوت مقيدينــــه
زين بني البيت في الأرض الحمادي=زين بَنْيه من شَعَر مهوب طينَـــه
مددت لطنــاب ثم دقت اوتــادي=قُوِّم ارواقه ونصفه حاجبينــــه
حوله ارجالٍ يصيــدون القـوادي=ما يعرفون المثاثا والرطينــــه
زين شوف الصيد في لرض الريادي=لا التفت خويكم يقول : وينـــه ؟
ما حلا لامن كفخ طير الهـــدادي=عقب ما للطير حِلّ مبرقعينــــه
يوم نفسي ما تحب إلا البـــوادي=زين شوف البر يا هل العرف زينـه
كود نسناس الهوا للنو قــــادي=بامر ربي والرعد تسمع دنينـــه
لاح برقه وانتثر وبله وجـــادي=سالت الشعبان والوادي بحينـــه
جعل يسقي ديرة الشيخ الجــوادي =خادم البيتين : مكة والمدينــــة
من ورا نجران وحدوده وغــادي =لين طريف والباطن ولينـــــه
حامي البيتين كل أمره ســـدادي=" أبو فيصل " طوَّل الله في سنينــه
يا الله إني طالبك يا خير هــادي =من بغى له حاجةٍ الله يعينـــــه
رب وفقنا على درب الرشـــادي =وكل واحد لا تحرمه من جنينـــه
ختمها صلوا عدد زوف الجرادي=للنبي اللي توفّى في المدينــــه
العرض الشجري