قصيده الشاعر/علي بن تويم المحلفي .. في الشيخ/ تركي بن لحيان البرازي..

راكب اللى فـوق كبّوتـه علامـه=أبيض ٍ لونه كمـا لـون الغمامـه
بانورامـا حجـم 600 خليـجـي=مركب التجّـار ورجـال الزعامـه
لا نطحته شفـت ميـزات التقـدّم=ولا قفيته شفت عنـوان الفخامـه
ووقفته وقفـة فريـق أوّل قيـادي=مايكفيـه الثبـوت ولا سـلامـه
كود من بعد الموسيقه والبروفـه=والعروض اللى تجي ضمن اهتمامه
وهيبته هيبة ملـك عنـد المجنّـا=في نهار ٍ فيـه للنـاس انقسامـه
خايف ومرتـاع وعيونـه تـراوغ=ولا قدر يجلا الملامه فـي كلامـه
والعفو من شيمة النفـس الغنيّـه=اعتقـه والمـوت واردة ٍ حيامـه
أفجح ٍ يعجبْـك ممشـاه وركوبـه=قبل لا ليل السعد يرخـي ظلامـه
حرّك المغـرب وسلّمتـه رسالـه=وانطلق والله يقـدّي لـه مرامـه
دق زر النـور واغـلاق النوافـذ=وشغل الشاشات ثم جـوّد حزامـه
وانتهض في لازمـه والحافـظ الله=والبروق تلوح من شرقه وشامـه
مثل توم الهوك في درع الجزيـره=لا خذا الإيعاز شلّع مـن شمامـه
وكن وجهه يـوم للطرقـه توجّـه=وجه شيخ ٍ منزلـه راس العدامـه
شيخ قوم ٍ له وقار ولـه حشيمـه=بين قـادات السرايـا والجهامـه
مثل سيف الله في وقته وعصـره=يوم سماه النبي واسمـه وسامـه
نصّـه اللـى فاللـوازم ماتـونّـا=أبلج ٍ لبْس المراجل لبـس خامـه
ابلـج ٍ يمنـاه تعطـي مـاتـدوّر=في مياديـن الشهامـه والكرامـه
راعي الطولات محمـود السجايـا=زاكي العرقين من خـال وعمامـه
لا قصر حبل الضعيّـف والمهجّـن=والربيب اللـى تربّـى فالرخامـه
عادته فعل الجميـل اللـى يجمّـل=لانكشف زيف الشعارات ونظامـه
ذاك ( ابن لحيان ) والطيّب بذكـره=( تركي ) اللى قومة النادر مقامـه
مد يمنى الطيب في حفـل القبيلـه=مثل سيل ٍ من طريف إليا تهامـه
مايحسـب للخسايـر والفـوايـد=دام عـزّه دوم ياربـي ودامــه
مرسل ٍ له موتر ٍ معـه الرسالـه=شكر شاعر مبدي ٍ كـل احترامـه
ماتسمع فـى الـردي ولاهروجـه=ولا تحيـزم بالمنافـق والهلامـه
ومامدح قصده يبي حاجه وعيشـه=من كبار الوقت وألاّ مـن حطامـه
ذاخره في ساعه ٍ والريق ناشـف=ساعة ٍ غطّى الجبل غيم وكتامـه
اشهد ان الطيب قدّك وأنـت قـدّه=ياوريث المجد ياسيـف الشهامـه
يالأمير معرّب السـاس الصميـدع=ياكعـام المعتـدي وألاّ خـزامـه
فعلك ينومس ومجهودك ينومـس=ولا احتمى الميدان طوّحت العمامه
للمراجـل درع وشـداد ومكانـه=وهامة ٍ تفرق على هامـه وهامـه
بين عربان الجزيـره والبسيطـه=الفعل ثابت على سـرج ومسامـه
يالأمير ابن الأمير الطيـب وافـي=منـك ياتـاج المـروّه والقرامـه
بعد أبوك اللّي له العربـان تشهـد=في فعـول المرجلـه والاستقامـه
وجدّك اللى يرعب الفرّيس صوتـه=لااعتزا والموت من خلفه وأمامـه
له تواريخ ٍ مـع العالـم اتـورّخ=في سنام المجد إلى يـوم القيامـه
وغير فعل ربوع وأعمام وخوالـي=من قبل كون السبيـه والرغامـه
ولـو بأغنّـي وآتمثـل واتنشـد=عن بحور ٍ موجها فيـه إلتطامـه
رفعت اوراق الصحف والقاف شيّب=ماحصرت امن البحر لو ربع قامه
مير شعر المدح في غيرك عوافـي=مثل قولت كيف حالـك والسلامـه
ألاّ في ناس ٍ لهم فالطيـب رايـه=رايه فالسلم والحـرب وعسامـه
الرجال أهـل المـروّه و السمـوّه=من مدحهم مايجـي درب الملامـه
والسلام معطـر ٍ بأحلـى التحايـا=في نهايات القصيد وفـي ختامـه