قصيدة بن مدلول السهلي بعد انتصار القبابنة في معركة الجنادرية

ابناء القبابنة وزوار واعضاء منتدى القبابنة
السلام عليكم ورحمة الله وبركاته
هذه القصيدة الي قالها بن مدلول من آل محيميد من السهول في القبابنة بعد ان انتصروا في معركة الجنادرية على العجمان
حيث ان بن مدلول كان جار للعجمان وسمع منهم المعركة وماجرى عليهم فيها حيث ان العجمان لم يهضموا حق القبابنة في المعركة مع انهم من خصمائهم فيها , وتنومس بن مدلول بفعل بني عمه وارسل لهم القصيدة التالية وهي قصيدة قديمة جدا ويذكر فيها ان شيخ العجمان في المعركة هو منصور بن منيخر

بادي ٍ في مرقب ٍ من شف بالي=وأتهيض في الغباء ما يسمعونه
راكب ٍ من فوق ما يشدى الريالي=وإن تذير هقوتي ما يلحقونه
قطبه بالكور ومسه بالحبالي=لا نوى بديار غرب ٍ ياصلونه
نحره مشنان فكاك الحلالي=سيف هند ٍ كل عام يصقلونه
جعل عمره دايماً يشدى شمالي=عز ربعه لا تحيزم في إردونه
لاد ابن قبان مبيحت الحلالي=كم صبي ٍ في نحاهم يطرحونه
كم عروس غبرت عقب الدلالي=شوقها يوم الملاقى يذبحونه
جاهم العجمان بجموع ٍ ثقالي=وأنكفوا منهم بخسران ومهونه
شيخهم منصور خلى الدلالي=والخيام اللي عليها يفتلونه

اتمنى ان اكون وفقت في ايصال القصيدة
وسلامتكم

 

الله الله ,,, صح لسانك ياولد بداح ,, ورحم الله بن مدلول السهلى , وهذا فعل الاد قبان ,, تحياتى يابومحمد .

 

لاهنت ولد بداح

ورحم الله الشاعر بن مدلول السهلي وغفر الله له واسكنه فسيح جناته

 

الله الله صح لسان أبن مدلول

 

”	المشاركة الأصلية كتبت بواسطة حد الرهيف الله الله ,,, صح لسانك ياولد بداح ,, ورحم الله بن مدلول السهلى , وهذا فعل الاد قبان ,, تحياتى يابومحمد .

كفو والله بالعجمان والف نعم وكفو بعيال عمنا القبابنه......فعولهم تشهد لهم أول وتالي

 

الله الله صح لسان أبن مدلول

 

لاد ابن قبان مبيحـت الحلالـي
كم صبي ٍ في نحاهم يطرحونـه


ونعم بربعي القبابنه والف نعم ...

ونعم بقبيله العجمان العريقه ولا يهنون باقي القبايل ...


وصح للسان ابن العم الشـــاعر بن مدلول آل المحيميد

دلاله على حميته ونوماسه في بني عمه القبابنه عندما علم

بما فعل ابناء قبيلته القبابنه مع العجمان وترجمها بها الابيات





يعطيك الف عافيه ياولد بداح وبالفعل وفقت بها السالفه والقصيده الجزله

 

لاهنت ولد بداح على ايرادك لقصيدة ابن مدلول السهلي التي قيلت في القبابنة بعد معركة الجنادرية والتي من خلالها توضح مدى التلاحم بين السهول والقبابنة من جهه وذكر أفعال وفرسان القبابنة وعلى رأسهم الفارس المشهور مشنان من جهه أخرى
ولنا وقفة إن شاء الله مع قصة المعركة والأحداث التي دارت بها قريباً إن شاء الله
مشكور ولد بداح

دمت برعاية رب العزة والجلال

 

بيض الله وجهك ياولد بداح عز الله ماقصرت والقصة معروفة عند الجميع

 

لا هنت يا ولد بداح على إيراد هذه القصيدة
وأتمنى عليك أن تزودني بما يتوفر لديك
من قصائد المدلول

وياليت تحدد بالضبط من قائل هذه القصيدة
من أُسرة المدلول

مشكور وما قصرت والقبابنة يستاهلون

 

”	المشاركة الأصلية كتبت بواسطة البرق لا هنت يا ولد بداح على إيراد هذه القصيدة وأتمنى منك أن تزودني بما يتوفر لديك من قصائد المدلول وياليت تحدد بالضبط من قائل هذه القصيدة من أُسرة المدلول مشكور وما قصرت والقبابنة يستاهلون

جاء دورك اخي البرق ونحن نطلب منك ذلك لأن القصيدة قيل انها ابن مدلول من آل محيميد الكرام وهي تقريباً مابين عام 1280 إلى 1300 هـ والله أعلم

 

”	المشاركة الأصلية كتبت بواسطة حد الرهيف الله الله ,,, صح لسانك ياولد بداح ,, ورحم الله بن مدلول السهلى , وهذا فعل الاد قبان ,, تحياتى يابومحمد .

ولاتهون يابو احمد ولاهنت على مرورك المتميز وتسلم طال عمرك وهذي فعول بني عمك تاج على الراس

 

”	المشاركة الأصلية كتبت بواسطة القباني لاهنت ولد بداح ورحم الله الشاعر بن مدلول السهلي وغفر الله له واسكنه فسيح جناته

الله يرحم بن مدلول واموات المسلمين فقد وثق المعركة من خلال قصيدته وكان لذكر اسماء الشخصيات التي شاركت فيها دور في حفظ بطولاتهم ومآثرهم