قصــــهاوقصيـــده لشــايــب هــواوي وبنـــت ملكعـــه وشـــاعــره

بدايه القصه عن شايب اسمه حمدان وهواوي ( قلبه خضر :ما يشوف بنت الا ينفتن... ومشهور بانه حبّيّب



وكان فيه بنت ملكعه وصاحبة مقالب قالت في نفسها انا ليه ما اروح للشايب وامزح معه واضحكه شوي

واشوف ردة فعله كيف تكون .



راحت له وسلمت عليه كيف حالك يا شايب رد السلام والله بخير الله يعافيس

وفجأه عطته ظهرها ومشت ولا استإذان ولا شي .....

ولع الشايب من حركتها ...

ثم قال فيها كم بيت يستعطفها فيها ويقول انها ذكرته الماضي و اذا ما عطيتيني وجه لحقت

باخوي حمود اللي في قبره ويذكر التاريخ واليوم اللي قابلها فيه ...

يقول الشايب :


يا بنت اخذي خاطري وارحميني *** لا تجرحين العود بعيونك السـود

غضي نظرك وغطي الوجنتينـي *** لعل يومٍ جدد الجـرح مـا يعـود

يوم انتهى مع مرمسات السنينـي *** جتني صواديفه على غير مقصود

باول شهر عشره نهـار الثنينـي *** حمدان مروا به على جنازة حمود



البنت كانت تقصد من استفزازه انها تجاريه في الشعر وترد عليه والمسكين ما كان يدري انها شاعره

وعلى باله ما خذ راحته في التغزل .

ردت عليه وهزأته

تقول البنت


يا شايب الرحمن وينك وويني *** عزي لحالك قدمك الباب مسـدود

قلبك عطوف وجاه قلبٍ متيني *** والبنت ما تشفق على مغازل العود

حبل الرجا مقطوع بينك وبيني *** مثل الغليث اللي رعا قلبه الـدود

اقفى شبابك والعرب مقبلينـي *** يا عود ما يرجع من العمر مفقود



حطمت حمدان يوم قالت له انك عود وان الشباب ما يرجع وان ما فيه امل تعطيه وجه ..

حس العود انه تورط وقال كم بيت يقول لها صدي عني انه ما يبي الغزل بعد ما وصل عمره ثمانين سنه

يقول حمدان :

يا بنت صدي بالعيون الظليله *** لا صد عنـك الله نهـار القيامـه

مالي ومالك يالفروع الطويله *** لو فيك من رسم البـداوه علامـه

يابنت ما لي بالثمانيـن حيلـه *** اهدف كما تهدف على البير قامـه

اقفى شبابي والدهر شفت ميله *** يالله حسـن الخاتمـه والسلامـه

اعطيك موجز والبضاعه قليله *** واخذت لك من صافي الماء سنامه

بعد فتره مرته مره ثانيه ورمت عليه السلام واستفزته وراحت وخلته وولع الشايب..

وقال ليه ما ابين لها في كم بيت انها بتشيب مثلي واني رجال طيب وان الناس تنصاني

ومعروف بالكرم واني ما ابي منها غير التحيه والترحيب ...


يقول حمدان


يا بنت ما جاس الكبر والخشونه *** وعادت شباب اليوم يجفل من الشيب

ياسرع ما وبلك تمزع مزونـه *** يالفاتنـه يـا ام الثمـان الرعابيـب

يا بنت ما بيني وبينـك مهونـه *** كلمة شرف نبي تحيـه وترحيـب

الله مـن عـودٍ ثقيلـه طنونـه **** ينصاه راع المشكلـه والمواجيـب

على الكرم والدين نفسه حنونه *** تلقاه بالاجـواد شـرق وتغاريـب



جهز الابيات وارسلها مع عجوز ووعد العجوز بهديه اذا وصلت الرساله لها

راحت العجوز وعطت البنت الابيات شافتها البنت وقفلت على العجوز في غرفه

وقالت مثل ما جيتي بابياته ترجعين بأبياتي ...

العجوز مسكينه قالت طلعيني ولا ابي منكم شي الله لا يعودكم انتم واوراقكم


ردت البنت ابيات اقوى من الاولى واكثر تحطيم مسكين الشايب ما احد رحمه حتى لو حاول يستعطف


تقول البنت

العود عود وطايحـاتٍ سنونـه *** من كثر ما يرقد على جرة الذيب

عودٍ مهرقل والعرب ما يبونـه *** ياعود ما لك في طويل المراقيب

اقفى شباب العود راحت حتونه *** مثل اليتيم اللي بكا ما له مجيـب

جداه ينثر دمعة ٍ مـن عيونـه *** غريق موجٍ ما لقا له مقاضيـب




عزتي لك من شايب

 

أخوي العروان
ألف شكر على المشاركة الأكثر من رائعة
الله يعطيك العافية على الحضور القوي

 

مشكور يالعروان بارك الله فيك

 

مشكور يالعروان بارك الله فيك

 

حضور مابعده حضور ,,,, تسلم ياالعروان ,, والبنت صدقت والله وماتنلام , والشايب صدق وماينلام ,,.

 

محمــد القبــاني

مشكور على المـــــــرور

 

ولــــــــــــد بــــــــــــداح
مشكـــــــــــور على المــــــــــــــرور

يعطيــــــــــــــــك العافيــــــــــــــــــــــــــة على تواصلـــــــــــــــــك

تقبـــــــــــل تحياتي وتقديــــــــــــــــــــــــــري

 

الغالي

حـــــــد الرهـــــــــــيف

ياهــــــــــلا فـــــــــيك وفـــــــي مــــــــــــرورك