قصيدة موجهة لأخي حمد بن فلاح بن فالح القباني
للرنج هيبة مثل هيبة مماليك=مايركبه ياكود من له مهابه
لا دق سلفه ثم حوّل تماتيك=ماكنه إلا بوينق فوق السحابه
الله يحرسه من عيون الصعاليك=وعيال فقر ٍ عايشين بغلابه
مركب شيوخ ٍ ماتكلم سوى بشيك=وقرم ٍ ينومس بالفعل لا غرابه
ماهو من اللي فيه شك ٍ وتشكيك=إلا عزيز القدر عالي جنابه
مثل إبن عمي يستحق التباريك=حمد عسى الله يسعده في شبابه
سر يابن عمي والمشاعر تحاكيك=دام المراجل فيك وهاك الحبابه
دامي أباهي فيك ليه ما أفتخر فيك=رفعت صيتي ياعزيز القرابه
ياكيف أنا ما أمدحك ياكيف ما أغليك=وأنت الذي بالطيب مالك مشابه
الأصل غالي والنسب غير خافيك=قبابنة يوم اللقاء ما تهابه
رد أخي حمد على القصيدة أعلاه
يا مرحباً يالقرم والله يحييك=والصدر للغالين كله رحابه
أرحب عسى رب المخاليق يحميك=ويزيل عن قلبك هموم وكآبه
ياوارث الأمجاد ما أحد ٍ يجاريك=أبوك فعله كل شخص ٍ حكى به
ياما ذبح للضيف حيل ٍ مباريك=بيته مشرع ما بعد صك بابه
الله يبيحه يابوخالد ويبقيك=ويجمعه ربي بالنبي والصحابه
وخالك رشيد ٍ بالمراجل مربيك=كم واحد ٍ خانه زمانه لجى به
شوره ورأيه في الغداري يقديك=أنا أشهد إنه مايخيب الرجاء به
شاعر وراوي ما يجي فيه تشكيك=كسبت منه الشعر حفظ وكتابه
خصايل ٍ فيهم وأنا أشوفها فيك=ما هي غريبة وأنت من روس لابه
قبابنة وقت اللوازيم تفديك=صبيهم فيه الوفاء والذرابه
العرض العادي
