بمناسبة دخول الوسمي ومعه يقرب موسم الأمطار اخترت لكم من قصائد شاعر التوباد سعد بن ثلاب ال ثلاب القباني .
يا هبوب الوسم هبي بالبرادي
ما وراك من الهوا لا تذخرينه
كود نسناس الهوا يحيى فؤادي
وتفرح اعيوني عقب ما هي حزينه
لا انشغل قلب الفتى حرم الرقادي
عزتي للي تعنى في سنينه
في سواد الليل للذيب اجتلادي
ومن لقى له حاجة تروب عينه
الله اللي يرزقك من كل زادي
وما كتب للعبد في عالي جبينه
مل قلب ضاق من شوف البلادي
ما يبي صوت البواري والمكينة
صجوا اذني بالمسجل والروادي
والعراوي في السكك تسمع حنينه
في الضحى في رأس الاشقر صرت بادي
يوم قلبي ما قدرت اكتم ونينه
ماحلا شوف الشجر في كل وادي
وكل شعب مع مسيله حادرينه
ما تشوف الا الرقيطي والسوادي
والحجل مع كل ري شايفينه
ذي عطايا الله توثرها جدادي
والفحل خلف البيوت مقيدينه
زين بني البيت في الارض الحمادي
زين بنيه من شعر مهوب طينه
مددت لطناب ثم دقت اوتادي
قوم ارواقه ونصفه حاجبينه
حوله ارجال يصيدون القوادي
ما يعرفون المثاثا والرطينة
زين شوف الصيد في الأرض الريادي
لا التفت خويكم يقول: وينه؟
ماحلا لامن كفخ طير الهدادي
عقب ما للطير حن مبرقعينه
يوم نفسي ما تحب الا البوادي
زين شوف البر ياهل العرف زينه
كود نسناس الهوا للنو قادي
بامر ربي والرعد تسمع دنينه
لاح برقه وانتشر وبله وجادي
سالت الشعبان والوادي بعينه
جعل يسقي ديرة الشيخ الجوادي
خادم البيتين: مكة والمدينة
من ورا نجران وحدوده وغادي
لين حد طريف والباطن ولينه
حامي البيتين كل امره سدادي
"أبو فيصل" طول الله في سنينه
يا الله اني طالبك يا خير هادي
من بغى له حاجة الله يعينه
رب وفقنا على درب الرشادي
وكل واحد لا تحرمه من جنينه
ختمها صلوا عدد زوف الجرادي
للنبي اللي توفى في المدينة
يا هبوب الوسم هبي بالبرادي
العرض العادي
