أســـج في دووٍ بعيـــدٍ لحالي
ونفسي عزيزة لا مهونه ولا ذل
ولا اطرد المقفي ولو كان غالي
وأصد واترك من تنقد ومن زل
هذاك طبع لي من أول وتالي
ثابت على مبداي ولا أتزلزل
وحي دفني حي ماله ومالي
حتى ولو يفرش لي الدرب بالزل
ارخصت للغالين جاهي وحالي
والي يبي فعل الجميل يتجمل
ماشلت في صدري من الي يشالي
ومنيب أنا الي تزعله ويتزيعل
قدر كبير السن هو راس مالي
ان غاب أو ماغاب ماينتبدل
وقدر صغير السن حسبة عيالي
اوجهه لـِ زل وافرح لـيـَ دل
ومن لاحشمني جعل مهوب فالي
ماهمني عندي مثل موقف وزل
والي يقدرني ولو ما عنا لي
قدره على راسي وفعله مجمل
أشيل معروفه وارده بحالي
ما نترك المعروف يكبر ويثقل
انا احمد الي عزني في حلالي
من فيض جوده مانحسب ونبذل
والمجلس الي فيه م ارتاح بالي
أرجي عسى راعيه فيه يتمهل
بعض العرب عنهم ابقصر حبالي
واطوي رشا بيري معاد اتحمل
الي مصبرني سنين وليالي
الي ظلال لي وانا له ذري وظل
مهيب لحية خل صدرك شمالي
صدر الشمالي يعقد الحبل ويحل
النفس لـِ طابت رخص كل غالي
لاعاد تنشدها عن الزود والقل
يشتب في صدري من الهم صالي
هم يتـل القلب من داخلي تل
منزلك ياراسي مع الناس عالي
وكلٍ على جسمه هدومه تفصل
أخذت من راسي كلام طرا لي
مشاعري تكتب والابيات ترسل
من شال حمله فوق متنه ومالي
زود على ثقله وميله بيثقل
والي يبي له صيت بين الرجالي
يطرق دروب للمراجل توصل
وجال العزا مهوب جالٍ هيالي
لــِ من تعنزتـه عليه يتهتمل
وبعض الهموم حمول ثقل الجبالي
وبعض الرجال جروم هرجه خذ وخل
وفي هالزمن مايرتكي لـِ الثقالي
الا الذي لاقد تعــذر ولا مل
ومواقف الدنيا مرايـــــا قبالي
وبعض الصور تغني عن مشاهد الكل
وبعض الكلام يسدّ لـِ جا مجالي
وجزل الكلام الي يوفي ولو قل
واٍن شفت لي عدٍ قراح زلالي
آرد على صافي قراحـه وآعل
مناكب الدنيا عراضٍ طوالي
ماضاع منهو يبخص الدرب ويدل
ومـآلـــها لـو طوَّلت…للزوالي
والي لها يتعب ويطرد بيرحل
العمر لا تبكيه … روضٍ وسالي
ينبت ويزفر ثم يزهر ويذبل
عبدالمحسن بن محمد القباني
العرض العادي
