شاعره ...تصلخ شاعر ؟

يقول أحد شعرائنا الشعبيين في قصيدة جميلةٍ طريفة ..... ولكن!!!!!!!!




مرت اللـي كنهـا بـدر التمـام
.....................من ورا السواق فـوق (البنتلـي
فاخرة .. والظن من راس السنام
..................مترفة في ضـف بيـت معتلـي
يـوم وقفنـا وجمعنـا الزحـام
..................بالعنـا دارت مرايتهـا عـلـي
وشدت الصـدر بنفَسهـا للامـام
.................والزجاج أرخته.. أمـر تفتلـي
وحركت من غيهـا راس البهـام
................وأشرت بالهمس .. عين البنت لي
وناظرتني .. نظرة ساقت هيـام
................كنها تقول : بـأشري بعت لي ؟
ما نهاها الخوف عن فـك اللثـام
................دمت لي يا مبتسمها دمـت لـي
بارق .. تقول مسلـول الحسـام
................ومنعش .. في كل ذوق ممتلـي
باغية مرام .. يا بعـد المـرام !
.............يا هواها .. كف .. لو لمّحت لي
ويا لاشارة وقفـي ستيـن عـام
.............وضمنا يالدرب لو سمحـت لـي
وانـت ياسـوّاق عاليـة المقـام
..............اشهد ان عمتك صابـت مقتلـي
همي الموت وهـواك الابتسـام
..............الخلي ما هـوب مثـل المبتلـي


........

و .. ردة عليه الشاعره ريوف الشمري بهذه الابيات الطريفه:h035:




يا سلام الله على الشاعر سـلام
.......................شاعـرٍ بلثـام بنـتٍ مبتِلـي
جعل ما تبلى بغالـي يـا همـام
....................و جعل عينك من حزن ما تهملي
كلمةٍ منـي وخذهـا بإحتـرام
...................و الأخوة بيننـا هـي مدخلـي
سامحك ربي علـى ذاك الكـلام
.....................وش بلى الشّعار قولوا يا هلـي
شِفت لك بنتٍ تناظر في الزحام
....................(من ورى السواق فوق البنتلي)
قلت بأنه بنـت عاليـة المقـام
....................مترفه مـن بيـت عـزٍ تنهلـي
وقلت بأنك ذبت في دنيا الهيـام
...................يوم عينك جَتْ بعينه يـا خِلـي
قلت لكنّك نسيت مـن الغـرام
..................وصف واحد لجل قافك يكملي
قلْ بعد ما تستحي والشـر قـام
..................في عيونه كـل فتنـه تعملـي
بنت لو تعرف وجوب الاحتشام
..................ما تِقِزّ بلا حيـا زيـد و علـي
ترسل النظره على العالم سهـام
................علَّها تلقـى بقلـبٍ مدخلـي
لا ... وفكتْ فوق من هذا اللثام
................استحي يا بنت حوا و اخجلـي
.
.
و أنت لو تنظر و أنا اختك للأمام
.....................كان ما قلبك غدا يغلـي غلـي
غِض يا خونا النظر وسط الزحام
.....................حتى ما تُبلـى بسهـمٍ مُرْسلـي
آآآه ليتك قلت له نصح و مـلام
....................استحي يا بنت .. كُفي و اعقلي
النظر فتنه و أشد مـن الحسـام
..................ضربته لو صاب جَت في مقتلـي
.
.
الندا من قلبـي لبنـت الكـرام
...................صِدي بالنظرات عنهم وابخلـي
لا تِقِزي غير زوجك يا سـلام
...................ما حلا (قَـزّه) مبـاح امحَلَّلـي
و أنت يا سواق عاليـة المقـام
..................قلْ لعمتـك (الخفيفـه) تثقلـي
قلْ لها (ماما) ترى والله (هـرام)
.................(مافي كويس) ترى اللي تفعلـي
عين (مال انتا) أبد (مافي) تمـام
...............(كل مافي يشوف) رجل يطلطلي
(بابا) نايم ،لكن الله مـا ينـام
...............احذري ( ماما ) عن الله تغفلـي



صح لسان الشاعره ريوف وكثر الله من امثالها وتحياتي لكم

 

بيض الله وجهك يافارس الأول وصح لسانك ولسان الشاعرة ريوف الشمري
وياكثرهم هالأيام ومن الجنسين الله يهديهم ويستر عليهم
وتقبل تحياتي

 

هلا بك
فارس الأول
تشرفنا بمشاركتك الرائعة
وهي بالحقيقة تعتبر من المساجلات والطرائف
الجميلة وإن كان لي من رأي كنت أتمنى أن يكون
إسم الشاعر للقصيدة الأولى متواجد حفاظاً على حقوقه
تحياتي لك
ودمت برعاية رب العزة والجلال

 

”	المشاركة الأصلية كتبت بواسطة ولد بداح بيض الله وجهك يافارس الأول وصح لسانك ولسان الشاعرة ريوف الشمري وياكثرهم هالأيام ومن الجنسين الله يهديهم ويستر عليهم وتقبل تحياتي

مرحبا بك اخوي ولدبداح

ونعم الله يهدي بنات وشباب المسلمين

وشاكر لك مرورك

 

”	المشاركة الأصلية كتبت بواسطة محمد القباني هلا بك فارس الأول تشرفنا بمشاركتك الرائعة وهي بالحقيقة تعتبر من المساجلات والطرائف الجميلة وإن كان لي من رأي كنت أتمنى أن يكون إسم الشاعر للقصيدة الأولى متواجد حفاظاً على حقوقه تحياتي لك ودمت برعاية رب العزة والجلال

مرحبا اخوي محمد

الشاعر غير معروف لدي حتى الساعه

وقصيدته هذي اظاهر عقب رد الاخت ريوف ماعد يبي حقوق فيها يبي الفكه ...والله اعلم !

تحياتي لك اخي الغالى واشكرك على المرور والتعليق

 

قلْ لها (ماما) ترى والله (هـرام)
.................(مافي كويس) ترى اللي تفعلـي
عين (مال انتا) أبد (مافي) تمـام
...............(كل مافي يشوف) رجل يطلطلي
(بابا) نايم ،لكن الله مـا ينـام
...............احذري ( ماما ) عن الله تغفلـي

بيض الله وجه بنت السناعيس أخت الرجال ريوف الشمريه

فارس الاول بيض الله وجهك على الموضوع المنتاز

لاد قبان

 

الاخ الكريم لاد قبان

يامرحبا بك وبمرورك والحمد الله نالت رضاك

تحياتي اخي العزيز

 

فارس الاول صح لسانك ولسان ريوف الشمريه , وعز الله انها صدقت ,, لاهنت يافارس وبيض الله وجهك

 

وصح لسانك ولسان الشاعرة ريوف الشمري