قصـــــة أبو دبــــاس
هذة القصة لايعرف متى وقعت ولكن بعض من الرواة قالوا إنها وقعت في القرن الثالث عشر والله أعلم
وبطل القصة محمد وهو من أهل بلدة عودة سـدير الواقعة في شمال غرب الرياض عاصمة المملكة العربية السعودية بحوالي 100كم يعيش في مزرعتة ومتزوج وله إبن واحد وإسمه دباس وبنتان فشب دباس على إحترام الناس وحب الخير وكذلك الكرم والشجاعة وكان والده يكنى له الحب بسبب هذه الصفات التي يتحلا بها إبنه دباس وعندما شب دباس وبلغ العشرون من العمر سافر في طلب الرزق ويقال أنه ذهب إلى العراق ومنهم من قال أنه سافر إلى عمان وفي خلال مغيب دباس عن والده تزوج الوالد بإمرأة وكان لها أخوه فأرادوا أن يتزوجوا من إبنتا محمد فرفض محمد ذلك فقام أخوة زوجته بعمل الدسائس ضده ونشر الإشاعات في البلدة وتعرضوا إلى إبنتا محمد ولم ينتهي الأمر إلى ذلك بل قاموا بقطع الماء عن مزرعتة مما أدى ذلك إلى هلك مزروعاته فتضايق محمد من أخوة زوجته ومما أصابه من الإهانات فأشار عليه صديق بأن يرسل في طلب إبنه دباس لعل في حضورة ينجلي هذا المصاب فأرسل محمد مع ركب متجه إلى تلك الديار قصيدة طويلة وفي مضمونها يخبر إبنه بماحصل له فقال محمد أبو دباس
ياونة ونيتهـا من خوا الـراس=من لاهـب ٍ بالكبد مثـل السـعيره
ونين من رجله غـدت تقل مقواس=يـون تالي الليـل يشكي الجبيـره
ياحمـس قلبي حمـس بن ٍ بمحماس=وياهشم قلبي هشـمها بالنجيـره
وياوجـد حالي ياملا وجـد غـراس=يـوم أثمـرت غرسه صفت عنه بيــره
على ثمـر قلبي سـرى هجعـة النـاس=متنحـــر ٍ درب عســـى فيـــه خيـــــره
الله يفكـــه من بــلا ســـوء الأتعـــاس=ومن شـــر عبثــات الليــاليي يجيـــره
في ديــرة تقطعـــت عنــه الأرمـــــاس=ســـبعين يـــوم للركـــايب مســــيره
لا والله إلا حـــال مـن دونـــه اليــــاس=حــط البحــر والبــر دون الجـــزيـــره
يالله ياللــي رد مــن عقــب ما يـــاس=يوســـف على يعقـــوب وأبصـــر نظيـــره
تــرد علي دبــاس يامحصــي النـــــاس=ياعالــم ٍ ما بالخفــــا والســـــريره
يادبـــاس أنا بوصيـــك عن درب الأدنـاس=تـــرى الـــذي مثلك يناظــر مســــيره
عليك بالتقـــوى تـرى العــز يادبـــاس=في طاعـــة الله مــا ينجيــك غيـــــره
هـذي ثمــان ســنين من رحــت يادبـاس=لا رســـالة ٍ جتنــي ولا مــن بــريــره
يادبــاس من عقبــك تــرى البال محتــاس=وعليــك دمــع العيــن حــرق نظيـــره
وعليــك كني في دجــا الليــل حـــراس=أصبــح على حيلــي وعينــي ســـــهيره
أصبــح وأنا ما بيــن طاري وهــوجـــاس=وطـــواري ٍ تطـــري علينــا كثيــــــره
مثـل الوحـــش قلبــي على كـــف حـــباس=يكفـــخ كمــا طيــر ٍ ســــبوقه قصيـــره
متحيّــر من عيلـــة البيـــت يادبـــاس=أرجــي ثــــواب الله وأخشــــى المعيـــره
أخــاف من حكــي العـــدا ثــم الأنجــاس=أهـــل الحكايــا الطايلــه والقصيـــره
ويقـــال خــلا عيلــة عنّــــز الـــراس=أقفــى وخـــلا عيلــة ٍ لــه صغيـــــره
وإلا فأنــا يابـــوك قطــاع الأرمـــاس=مانــي بمثبـــور ٍ ورجلــــه كســـيره
آصلك لــو دونــك نبا حمــر الأطعــــاس=الصلـــب والصمّــــــان دار ٍ عســيره
مهـــــالك ٍ مـــدارك ٍ مابــها أونـــــاس=إلا الثعـــل والبـــوم تســـمع صفيـــره
لو كنت في نزوا وديرة بني ياس=أهل الموازي والوجيه الغبيره
عبادة الأصنام شرابة الكاس=الخمر والتنباك فيها وغيره
لا أركـــب على وجنـا من الهجـــن عرمـــاس=فجــا النحـــر يادبــاس حمــرا ظهيـــره
متـــروس الفخــذين مزبـــورة الـــراس=كــن الخـــلاص عيونهــا مســـــتديره
تســـرح من العـــوده على نـــور الأنفـاس=عنـد الفجــر والليــل مقفــي مــريــره
والعصــر بالصمّــــان تســـمع لها أضـراس=حبل الرســن خطــر ٍ تبتـــر جــريــــره
نهــار ثالــث بيــن حمــــا والأوراس=واره يمينـــك جعلهـــا لك ســــفيره
ثـــم ٍ على ســــاجية ٍ تقلـــب الـــراس=تمشـــي بأهلها في البحـــور الغـزيــره
إلى مسقط الفيحاء بها الخير محتاس=لولا الكفر والشرك واوي ديره
عز الله إنها ديرة ٍ مالها أجناس=لولا بها يعبد مع الله غيره
لولا بها يشرك علي ٍ وعباس=أيضاً بها الفروق سبه بريره
فيهاالطبيـــخ وراهي الخبــز يادبـــاس=يقعــد خــوى الــراس خنــة خميــــره
هي ديــرة اللي باغــي ٍ كيفــة الـــراس=ولا له حــد همــه من النـــاس غيــره
هيــس ٍ ولــد هيـــس للمــواعين لحــــاس=يفــرح ليا نيــدي لذبــح النحيـــــره
ما قفــك ذا يادبــاس ما فيــه نومـــاس=يصلــح لقين ٍ مهنتـــه طـــق زيــــره
تــرى الفــداوي دون وأنت إنشــــد النـــاس=راعيـــه ما يذكـــر بمـــدح ٍ وغيـــــره
ما له ســـوى طق الحنـــك منه واليـــاس=واليا انقطـــع خــرجـــه فلا له ذخيــره
طلب المعيشــــه بالحـــراثه والأجنـــاس=المشــــترى والبيـــع يوصــف وغيــــره
قم إنهض العيـــرات مع كـــل فــــراس=يادبــاس دوّر خيّــــر ٍ تســـتشــــيره
جــــدّك وعمـــانك هـــل العــز والبـاس=أهــــل المواجـــب مكمليـــن القصيــــره
يادبــاس ما يصبــر على البـــق والحاس=إلا الـــذي مالـــه بنجـــــد ٍ عشـــــيره
واليـــوم يا مـــروي شــــبا كل عبــاس=أنــت الرجــى ياكعـــام وجــه المغيـره
عشــــرين عــام ٍ كلها أرجيــك يادبــاس=مثــل الغريــر اللي تولــع بطيــــره
عــدل المناكــب هيلــعي فرخ قــرنــاس=يمنــاه في لطــم الحبــــاري شـــطيره
عانــق خلـــوج ٍ روّحــت عقــب مــــرواس=عنــد العصيــر لبيضهــا مســـتذيـــره
الليل جــاها وحــال من دونهــا اليــاس=روحه على فرقـــاه فـــرّت فريريـــه
يادبــاس أنا يابــوك ما نيــب بـــلاس=ميــر إن عيـــلات الرفــاقــه كثيـــره
جنبت وســـط الســـوق وأمشــي مع السـاس=وآخــذ شـــوي الحــق وأتــرك كثيــره
ويش عاد لو روّحت لي دحــب الأكيـــاس=مختلفــــة ٍ ما بيــــن زر ٍ ونيـــره
ما لي بهــا ياجعــلها بألــف قبــاس=أو جعلهــا تذهـــب ولــو هي كثيـــره
يادباس قلبــي كل ما هـــب نســــــناس=شـــرقيــــة ٍ هبـــّت بقلبي ســـــعيره
والحـــال يافـــرز الوغى مســــها الباس=عليــــك ياناطـــح وجيـــه المغيـــره
وغصــــون قلبي يافتــى الجـــود يبّــاس=غـــاد ٍ أنــا يابــوك كنــي هشـــــيره
مــن شـــافني بيقــول ذا فيه لســــاس=واللي بــراء حـــالي إلآهــي خبيـــره
لا وآحلا من قبــل غـــوّال الأنفــــاس=ومفـــارق الدنيـــا يجينـــا بشــــيره
عســى يطــق البــاب والنــاس غطـــاس=ياوالـــي القـــدره عليـــك تعبيـــره
وصـــلاة ربــي عـــد ما هــب نســــناس=على النبي عـــدة حقــــوق المطيـــــره
وقد أشاع أخوة زوجته بان إبنه دباس يشرب التنباك وأنه يحضر مجالس الطرب وغيرها من الإشاعات التي أدت إلى أن محمد أبو دباس يعيش في هم وغم من هذه الإشاعات التي راجت في البلدة وبعد أن تسلم دباس رسالة والده بعث إليه بقصيدة يخبره فيها بأنه لايسمع إلى تلك الشائعات وبأنه محافظاً على المرجلة التي عوده عليه والده وكذلك يبشره بأنه قادم لمساعدته في محنته فقال دباس هذه القصيدة رداً على قصيدة والده
حي الجواب اللي لفانا من الراس=جابه غلام ٍ ما توانا مسيره
أهلاً هلا به عد ما حبك قرطاس=أو ما كتب فوقه بيوت ٍ شطيره
جواب من هو لي مود ٍ من الناس=أبوي ما يوصف حلي ٍ لغيره
فرز الوغى كنه على الوكر قرناس=إقروم ربعه كلها تستشيره
دليل عيرات ٍ ليا هب نسناس=ثم أدلهم الجو مابه ذخيره
مفني الغنم لأهل الركايب والأفراس=لا روحوا له لا عليهم قصيره
راعي معاميل ٍ لها العبد جلاس=للبن يشري بالسنين العسيره
هذي بمركاها وهذي بمحماس=وهذي يصبه للوجيه السفيره
وخلاف ذا يا راكب ٍ فوق عرماس=مأمونة ٍ من نقوة الهجن عيره
حمرا وهي في سنها وقم الأسداس=بالسن لا فاطر ولا هي صغيره
ماهي لحوح ٍ راكبه بالعصا قاس=حرّم عليها غير شيل النجيره
والخرج هو وبيوت قيل ٍ بقرطاس=مع مزهب الأيام ما هي كثيره
وفوقه غلام ٍ منوته قطع الأرماس=لو هو بليل ٍ ما تغير نظيره
وليا لفيت الدار فإجهر بالإحساس=وبلغ سلامي كل ذيك العشيره
وإختص إبوي اللي نفل جملة الناس=وخصه بعلم وقل تراني بشيره
لا يا نقي العرض يابوي لاباس=كان تشتكي الضيم فأنا اللي أسيره
وإن سايلك عني تراني بنوماس=وأنا أحمد اللي ما توسلت غيره
المدح لو يشرى شريناه بأكياس=بأموالنا نرخص ندور الستيره
مطرق إفرنجي ٍ مضاريبه الراس=ومصلبخ ٍ جبته عساني ذخيره
من صنع نصراني ومشروبه الكأس=يذكر ورى جاوه بعيد ٍ مسيره
أبغيه للي حاديينك على الساس=أهل النمايم والحكايا الكثيره
ربع ٍ نووا فيك الردا والتخساس=مهبول ياللي قال غايب عشيره
علي دين لودع الجمع ينحاس=لين العشير يقوم يلعن عشيره
يابوي أنا ما رحتنا لكيفة الراس=مع ذا ولا ني في سفاه ٍ وغيره
إن ما سكنا الدار من غير هوجاس=وإلا نعاف الدار ونضوي لغيره
كله لعينا كلمة ٍ قلت يا دباس=تشكي وأنا دوني بحور ٍ غزيره
خذ لك يمين الشرع قطاع الأنفاس=إنه فلا جتني علوم ٍ بصيره
ولا خبر جاني ولا حبر قرطاس=أيضا ولا جتني علوم ٍ سفيره
يم البحر مشروبنا فك فنطاس=والماء هماج ٍ منه كبدي غثيره
وإن كان تشكي الضيق يابوي لاباس=جاك الفرج يابوي هو والبريره
يا مسندي يابوي شوف أوكد الناس=ثم إنشده قل ويش هو في مسيره
إن كان ما يفرح صديقك بنوماس=تحرم علينا اللي نهوده صغيره
مدلول مجهول ٍ زها زين الألباس=بنت الذي يثني ليا جت كسيره
طار ٍ يقول أظهر وطار ٍ بجلاس=قمت أشرب التنباك وإثره نكيره
أبغي عسى الله يبرد القلب يا ناس=من لا هب ٍ شبّت بقلبي سعيره
ومن كان له غايب فلا يقطع الياس=إن قدّر الله جاب علمه بشيره
وفي أحد الأيام خرجت إبنة محمد أبودباس إلى الساقي لتجلب الماء إلى البيت فشاهدت الماء يجري ولونه أحمر فذهبت إلى والدها فأخبرته بما شاهدت فقال إن هذا إبني دباس قد عاد وهذا الأحمرار هو دم من قاموا بإهانتي وفرح الأب بعودة إبنه دباس وأصبح يمشي في البلده مرفوع الراس والكل يقدر شجاعة إبنه دباس وهذه من القصص التي تناقلتها الرواة في جزيرة العرب .
وإلى أن يحين لنا الموعد مع قصة وقصيدة أخرى تقبلوا تحياتي
ودمتم برعاية رب العزة والجلال
العرض العادي
