رشيد بن مساعد ينخى القبابنة

قصيدة للشاعر/ رشيد بن مساعد القباني وهي نخوة موجهها الى القبابنة ويدعوهم الى اتحاد الكلمة والصف وهي شامله للبدو والحضر ولا يخص فيها رجل دون آخر

عند الضحى بادي في مرقب عالي=رجم طويل تعلّى الارض مزمومي
واللي حداني لذبّه ضيقة البالي=وألا فلاني على ذبّه بملزومي
قم وارتحل يانديبي طيّب الفالي=جمس يقرّب ريادي بيد وحزومي
يشوق عينك معا دوّ الفضاء الخالي=من عندنا ودّ وهات بعلومي
ملفاك من عندنا ذربين الافعالي=ربع إلا جيتهم يشفون وقرومي
ماخص رجّال منهم دون رجّالي=لاجيتهم ودّهم سلامي عمومي
فان قالو اقلط حاذور تذوق فنجالي=قل لي لزوم وراي وطرّف اليومي
وعقب التحية قل تكفون ياعيالي=العز مايدركونه نِذِل ورخومي
مايدرك العز كود الحال والمالي=والفقر مايقبله في الضيق مزحومي
ماخبر يمنى تصفّق كود بشمالي=ترى التفرّق ذهاب القوم معلومي
لاصار في مثل هذا يرخص الغالي=الحيف مايرتضي به كل شغمومي
ماهوب يرضى به الاهافي الخالي=خطوات نذل من الطالات محرومي
لانتمب قلّه ولاذلّه ولا انذالي=لاشك أخاف الفشل يودعكم قسومي
الشره ماينصدم ياكود برجالي=ربع تفك لحسَبها الراي وعزومي
من عجز في الهيّنه ماشال الاثقالي=ومن شذ من لابته يصبر على اللومي
خطوى الولد لا اعتبر ابقوله انقالي=ان كان مافوق كبده مرّ ويزومي
والحر لامن قٍنص به صيده اجزالي=له موكر عالي عن موكر البومي
ورفيقي اللي لاجت شدّة جالي=راعي المثل قال خلاّن الرخا قومي
وفي الآخره مالكم كود الاعمالي=لاصار مابه فرج لاصرت مضيومي
ترى التكاتف شرف في كل الاحوالي=فان كانكم نايمين اصحو من النومي

مع أجمل تحية من اخوكم

عديل الروح

 

صح لسان ابومساعد ملايين
ابيات جزلة من راس جزل ونصيحة وافية لأبناء القبابنة
والحمد لله الكلمة بأذن الله متحده والصف واحد والتواصل اليوم افضل من الأمس وبمراحل
وسيكون في المستقبل اكبر
وابومساعد حميته وافية للجميع والله لايفرق بيننا
جزاك الله خير ياعديــ الروح ـــل

 

من عجز فى الهينه ماشال الاثقالى = ومن شذ من لابته يصبر على اللومى

صح لسانك ياعديل الروح ولسان الشاعر الكبير رشيد بن مساعد , والاتحاد قوة بلاشك , تحياتى لك وللوالد العزيز .

 

صح لسانك ياعديل الروح ولسان الوالد رشيد واطال الله في عمـــره

 

ترى التكاتف شرف في كل الاحوالي=فان كانكم نايمين اصحو من النومـي

صح لسان الراوية والشاعر رشيد بن مساعد
بيت عبارة عن رسالة فأين من يفهم ؟

بيض الله وجهك عديل الروح على المشاركة الجميلة
تقبل خالص التحية

دمت برعاية رب العزة والجلال

 

صح لسان من قال وصح لسان من نقل قصيده قويه
ومعانيها رموز ولكن من يتقيد بها

 

اخواني الكرام

صحّت ابدانكم جميع

وعسى الله يجمع شمل القبابنة جميع ويجعل كلمتهم وحده

اخوكم
عديل الروح

 

ربعنا الجمعى ترى الجمعى معزة
*************والتفرق هو ذهاب للحمايل


صح لسان ابو مساعد وأطال الله في عمره
وقصيدة تعالج موضوع مهم يحتاجه القبابنة
وإنشاء الله المستقبل يبشر بخير
والله الله يا شباب القبابنة
في الوعي بأهمية الإتحاد وتقليل مساحات الإختلاف

ترى التكاتف شرف في كل الاحوالي******فان كانكم نايمين اصحو من النومي

 

مشكور اخوي فهد