رشيد بن مساعد ومرثيته في طعيس العروان

مرثية الشاعر/ رشيد بن مساعد القباني في طعيس بن حمد بن عروان القباني رحمه الله
وهو عم المشرف المتألق دائما (العروان)

مرحوم ياللي وسط هجر ٍ دفناه=في النص من عشر رمضان الأخيره
عسى ملايكة الرضى ماتعداه=من قدمه وخلفه وحوله تديره
وعسى ملايكة الغضب ماتولّاه=و يجار من هول الحساب ونكيره
وعسى بنات الحور قِدمه تلقّاه=في جنة الفردوس طوبى مصيره
ويالله عسى حسناه تمحى خطاياه=ويجار من نار تواقد سعيره
عزّ الرفيق إلى تحمّس له وجاه=ولاكثّر العثرات عند العشيره
مهوب مقرود يعادي دَناياه=ولاهوب مثبور يدور لقصيره
جاره إلامن غاب يامن سجاياه=وفي كل زاد البيت جاره خشيره
ياليت موته عفّ عنّه وخلّاه=خلّا صخي الكف واختار غيره
ليته خذا بعض الوجيه المهذّاه=خطوى أقشر شرّه يجي قبل خيره
لغاصمه من الغيض دايم معبّاه=وزاكورته منفوخة من هَريره
هرّ طروق الشر ماهيب تخفاه=والخير طاروقه يجنّب مسيره
مهوب قرم تبذل الجود يمناه=ولاهوب نطّاح الامور الكبيره
راعي اللزوم إن جاه ماهوب يلقاه=عليه من نطح المواجيب جيره
لاصار في المجلس كبار حكاياه=وكل الأوادم في لسانه حقيره
هذا يشوّه به وهذاك يدهاه=والعيب فيه ولايخاف المعيره
ليته سكن قبر الشلي وإنه فداه=ليته فدا الطيّب وفي الأمر خيره
لاشك مايكتب على العبد يرضاه=ابن آدم معرّض للأمور الخطيره
والامر للي لاخلق خلق أفناه=هذا يروح وذاك ياتي بشيره
وصلاة ربي عدّ وبل نثر ماه=وعدّ الشجر ورمال شبه الجزيره
على نبي قوّم الدين وأرساه=شيّد عواميده وقرّر قريره
شفيعنا يوم النّصَف والمواساه=يوم به الوالد يجنّب غريره

مع أجمل تحية من اخوكم

عديل الروح

 

الأخ الكريم عديل الروح
السلام عليكم ورحمة الله وبركاته
صح لسان الوالد رشيد بن مساعد القباني على الأبيات الجزلة
ورحم الله العم طعيس بن حمد بن عروان القباني وغفر له واكرم نزله
وانشهد ان ابومساعد يغليه بالحيل ويستاهل الغلا
بيض الله وجهك على النقل المميز للقصيدة يابورشيد
لكن فقدناك يالغالي في الفترة الأخيرة
اتمنى التواصل وعدم الأنقطاع
بلغ كثير السلام لبومساعد

 

حى الله عديل الروح والساعه المباركه تزاجدك وفى الحقيقة افتقدناك ولك مكان كبير فى المنتدى , لاتطول ترانا بأنتظار مشاركاتك المميزه ,, تقبل تحياتى .

صح لسانك ولسان الوالد العزيز ورحم الله طعيس بن حمد , يستاهل قصيدة جزله وبيض الله وجهك ووجه الوالد ,تحياتى .

 

هلا بك ياعديل الروح
الساعة المباركة تواجدك وعودة حميدة
لنا عتاب على غيابك عسى المانع خير
القصيدة جزلة المعاني صوّر من خلالها الشاعر
أصدق العبارات وتطرق إلى الصفات التي تحلى بها المرحوم
فهي بمجملها تعتبر من القصائد التي لا يستطيع الشاعر المبالغة فيها
فمثل قصائد الرثاء تأتي تلقائية مترابطة تجسد روعة تركيب الأبيات وتسلسلها
وتوظيفها التوظيف اللائق مما يرتقي فيها الشاعر إلى عالم آخر
تسهل له عملية الإبحار في عالم النجومية والإبداع
فقصائد الرثاء دائماً ماتكون صادقة التعابير قريبة إلى النفس
حقيقة قصيدة رثائية جميلة من شاعر متمكن وغني عن التعريف
أطال الله في عمره وقد رثى بها شخص عزيز
فقده الصغير قبل الكبير ومحبوب عند الجميع
رحمه الله وأسكنه فسيح جناته
ولي رجاء أن لايطول الغياب خصوصاً مثلك وشرواك
لا نرضى بإبتعاده عن المنتدى
تقبل خالص التحية

دمت برعاية رب العزة والجلال

 

الله يرحم العم العزيز
طعيس بن حمد بن عروان القباني
واسكنه فسيج جناته فهذا الرجل الذي يحمل من الصفات الكريمة الكثير والكثير والجميع يثني عليه وكما قال عليه الصلاة والسلام ( انتم شهداء الله في أرضه ) او كما قال عليه الصلاة والسلام.

العم رشيد بن مساعد يخلد اللناس الطيبة افعالهم الطيبة جزاه الله خير الشكر للأخ عديل الروح على تقديمه لهذه القصيدة الرائعة .

 

	ألف شكر اخواني على المرور وجعل العافية ما تفقدكم جميعا ان شاء الله وألاحظ ان ابوخالد متأثر بالدكتور غسان في شاعر المليون

 

الله يرحم ويغفر
لطعيس بن حمد بن عروان القباني
واللهم إجعل الجنة مثواه وتقبل هذا الدعاء الذي آمنا عليه جميعا/

عسى ملايكـة الرضـى ماتعـداه=من قدمه وخلفـه وحولـه تديـره
وعسى ملايكـة الغضـب ماتـولّاه=و يجار من هول الحساب ونكيـره
وعسى بنات الحـور قِدمـه تلقّـاه=في جنة الفردوس طوبـى مصيـره
ويالله عسى حسناه تمحى خطايـاه=ويجار مـن نـار تواقـد سعيـره

آمين آمين آمين

وصح لسان الوالد ابو مساعد
وقصيدة رثاء بها عاطفة حارة و صادقة
في رجل أثنى عليه الجميع بالخير

ويعطيك العافية ياعديل الروح على نقلك لهذه القصيدة

أخوك /
فهد ال ثلاب

 

الله يرحمه ويرحم أمواتنا جميعا ومشكور ياعديل الروح على طرحك لقصائد الرثاء فهي الصادقة والمعبرة عن النفس

 

فهد آل ثلاب ومهنا مشكورين على المرور الجميل

والله يقبل دعاؤكم ان شاء الله