السلام عليكم ورحمة الله وبركاته
الكل منا تذوق لقصائد راعي مرات أبو عبدالله أو شاهد له أمسيه شعريه له عدة أمسيات منها ماظهر في قناة صوت البادية ومنها لم يظهر مثل التي أقيمت في البحرين كانت خاصه ومنها ماظهر في الراديو في الخيمة الشعبيه .
السيرة الذاتيه
الأسم المستعار / راعي مرات
الأسم / عبدالرحمن بن عبدالله المجلي السبيعي
الميلاد / مرات
العمل / في مجال التربية والتعليم
الموقع الخاص موقع آل مجلي والله يحيي الجميع ويحي كلن بأسمه
هذا برنامج الخيمة الشعبيه وكان من ضمن شعراء مرات الشاعر راعي مرات
الحـر يزكـي.. والدجاجـه.. دجـاجـه
وماني علـى بعـض المقاريـد مجبـور
الضـرس قلـعـه لا تـألـم عـلاجـه
لا صار مـا ينفـع معـه طـب دكتـور!
وحكي القفى في الناس عيـب وسماجـه
واللي يتتبـع عـرض الأجـواد مثبـور
(نارد) قرا ح المـاء ..ونتـرك هماجـه
هـذا لنـا مبـدأ.. ومنهـج ..ودستـور
واللـي يطفـي فـي الغـداري إسراجـه
لايحتري قمراء ..ولا يرجـي النـور !!
تـراه يضيـع صيدتـه فـي عجـاجـه
لا يسمع الناصـح.. ولا يأخـذ الشـور
والكـل يبخـص فـي الشدايـد خراجـه
لا نشبت اللقمة من الغبن فـي الـزور !
والحـظ لابـان الـردى فـي حجـاجـه
أصبـر مـدام الصبـر ياخـوي مقـدور
الله خلـق كـونٍ وسـيـعٍ.. فجـاجـه
والعبد لو يطـرد وراء الـرزق معـذور
و(راع) الرفيـق ولا تعـكـر مـزاجـه
خلـه سعيـدٍ دايـم الــدوم مـسـرور
كسـر الخواطـر مثـل كسـر الزجاجـه
نفس البشر دم.. وأحاسيـس.. وشعـور
واللـي يتصـدد مالكـم فـيـه حـاجـه
يالله عسى إللي يدور الستر .. مستـور
وحذرا تصير لبعض الألسـن (علاجـه)
بعض البشر يحلف.. ويشهد ..على الزور
والتمـر يعـرف طيبـه مـن خمـاجـه
ماجـور ياللـي تدهـل الطيـب ماجـور
الـواحـد القـهـار راعــه ونـاجـه
الله يكافينـا مـن الضـيـم والـجـور
يقولـه إللـي قاسـي الوقـت عـاجـه
صابر وهمـه داخـل الجـوف مقبـور!!
أتمنى أن تروق لذائقتكم الشعرية.....
""""""""""""
-
يامن يدير الفكـر يمـي وصوبـي
ياخذ معي من كيف الأجواد فنجـال
همٍ بصدري شب فينـي شبوبـي؟!
مايبرده ..ياكود.. بدعـي للامثـال
أذرى إلـى هبـت علـي الهبوبـي
والرزق عند الـرب عـلام الآجـال
ماني غشيمٍ في المواجيـب دوبـي
أبـا أتعلمهـا سوالـيـف جـهـال
يممت في الدنيـا شمـال وجنوبـي
بقعـى تغنيبـي علـى كـل مـوال
أمشي بفكـري وأتوجـس دروبـي
رقيت بـدروبٍ عسيـرات وطـوال
والناس لو تحكـي وتأكـل جنوبـي
الحكي ما يهفـي للأجـواد مثقـال
أويق في صدري واطالـع عيوبـي
أخاف يشناني مـن النـاس عـذال
ناس لهم حشمه وهم مـادرو بـي!!
لا واحسايف ..كيف ذاك الغلى زال؟!
داسو جميع العـرف مـا حسبوبـي
واقفيت في فالٍ وهم مثل فـي فـال
خطرٍ أمزع من عنا الوقـت ثوبـي
لامن ذكرت إني لهم ستـر وظـلال
والصاحب إللي عشرتـه ماتروبـي
يصير فـي دنيـاك هـمٍ وغربـال
وترى العتب بين القرايـب يذوبـي
رفيقنا لاحتاج نرضيـه فـي الحـال
نتعب على شأنه ..ونرخي الجيوبـي
ونقوم بالواجـب ولا نغلـي المـال
وصلاة ربي عـد رمـل الخبوبـي
على النبي وإعـداد ماهـل همـال
""""""""""""
أوصاف وأجناس لبعض البشر
بعض العرب يكفخ كما فرخ قرناس
وبعض العرب يجمع مع العز نوماس
وبعض البشر عرفه كما عرف بومي
وبعض العرب يزمي على روس الأطعاس
متسنم ربعه بعالي الغيومي
وبعض البشر يذي كما البق والحاس
الرابح اللي صار منه معدومي
وبعض البشر ودك على الخد ينداس
نذل خسيس ما يعرف السلومي
يبحث عن الصيدات والكيف والكأس
يارد مواريد الخنا والرخومي
وبعض العرب تدعي عليهم بالأفلاس
مما عطاه الرب منه محرومي
وبعض العرب يعطي بلا عد وقياس
يا عل خيره للبرايا يدومي
وبعض العرب لازود لا نقص لابأس
مراجله قده وقد اللزومي
وبعض العرب أمره على العين والرأس
ربعه شغاميم العيال القرومي
وبعض العرب عالة كما سوس الأضراس
ثقيل نفسٍ لاقعد ما يقومي
وبعض العرب ملجا إلى حميت الطاس
لاجاء اللزوم وثار عج السمومي
يضرب على الكايد كما ضربة الفأس
يصطي على العايل شجاع قحومي
وبعض العرب ذكره يغطى بالأخماس
وبعض العرب صيته تعدى النجومي
وبعض العرب منصا على العد جلاس
عز الخوال وعز كل العمومي
وبعض العرب ينقل على الهم هوجاس
حياته القشرى عذاب وهومي
وبعض العرب قوله يوثق بقرطاس
وبعض العرب هرجه سواة الحلومي
وبعض البشر خراط نصاب بلاس
يضحك على العالم بزين الهدومي
وبعض البشر يضن حاله بتكساس
ما يستحي ما ينتخي ما يشومي
أقولها من ما جرالي من الناس
أخص بعض الربع دون العمومي
وأنا أعرف أن البعض مرهف وحساس
وما به على الطيب بيان وسومي؟
""""""""""""
الليل لاعسعس نجومـه درابيـل=تكشف بقايا السالفه والفضيحـه
والصبح يتنفس على ريحة الهيل=يشتاق لعلوم النشامى الصحيحـه
والكبر ( آفه) والدناوة غرابيـل=والـذم طبـعٍ للوجيـه الكليحـه
الزود يبشر صاحبـه بالبهاذيـل=مجنون منهو ما استمع للنصيحه
شخصٍ جفته المرجله والرجاجيل=هرجه كثيرٍ والصمايـل شحيحـه
الجرم وافي لكن العقل بـه ميـل=يكذب وكذبه بيـنٍ مـن فحيحـه
هماز.. لمازٍ.. قليـل المحاصيـل=عتلٍ.. عليلٍ دوم نفسه كسيحـه
(رفيق للشيطـان) نقـال للقيـل=ماشاف له خير ولا شـم ريحـه
فكره عليل.. وزاده الكبر تعليـل =الناس تضحك به وهي مستريحه
جنسه ذروقٍ مثل صوايـة الليـل=من ذم فعله ياعسـى الله يبيحـه
ماينفع (الأفاك) كثـر التهاويـل=زيفه تبيـن ولفضتـه الفسيحـه
مافي يده دبره ولا في يده حيـل=قلـه تـريـح الاوادم مريـحـه
وقله قصيده والحكي والمواويـل=مترديه وحده.. والاخرى نطيحه
وقله ترانا نبخص الجدي وسهيل=نسبر مطاليعه ونعـرف مطيحـه
وقله ترانا من عصـاةٍ مشاكيـل=نطـرخ بعـزٍ كاسبيـنٍ مديحـه
وقلـه ترانـا مانهـز الفناجيـل=إلا بوجه إللـي علومـه قبيحـه
وقله ترى كثر البكـا والسعابيـل=ماعز شخصٍ يطحس في مطيحه
وقله يجوز ويترك القال والقيـل=ليه المروه عرضها يستبيحـه؟!
وقله يسد بغترته جاري السيـل=يقطعك يسرىً دلوهـا ماتميحـه
العمر يفنـى والليالـي مقابيـل=وكلٍ يحاسب لادفن في ضريحـه
يامن نشدني عن جميع التفاصيل=جتك العلوم الوافيـه والصريحـه
وعيبٍ علي إني اجاري مهابيـل=لكن عصت شوري بيوت القريحه
هذا وصلى الله على سيد الجيـل=إعداد ما ينبت من الغيث شيحـه
""""""""""""
آه.. من قلبٍ معنىً ما استراح
لاهبٍ في داخل ضلوعه يفوح
كل ما ليل الشقى أدلج وراح
دك في الخفاق غربالٍ يلوح
حظٍ أقشر لاجت الصملات طاح
يعجز يحقق ولو بعض الطموح
إن ركبنا البحر خانتنا الرياح
وإن بغينا القاع ضيعنا الصروح
مانفعنا الصبر وانواع الكفاح
(مرمسات) العمر زادتنا جروح
المشقى لو تتقى بالصياح
ماقدر ينطق ولا يقوى يبوح!!
والتشكي ..والتبكي ..والنياح
مايعدل ميلة (الوقت) الشحوح
أختلط صوت الحقيقة بالنباح !
واختلط جد الليالي بالمزوح!!
والنجاح إللي يسمونه نجاح
في مفاهيم العنى عندي جنوح
لو شربت الماء وهو عذبٍ قراح
ينقلب ( تيزاب) ويسبب قروح
جيت انآ أنشد عن الدرب البراح
أتساءل يابشر من وين اروح
تايهٍ محزون مكسور الجناح
مالقيت إللي مودٍ لي نصوح
وكل داجي ليل يجلاه الصباح
والقوافي المبهمه تبغى وضوح
أسأل الله دوم يرزقنا الفلاح
وارجي الرحمة من الرب السموح
ويجعل الدنيا لنا خير وصلاح
قبل مانحمل على كتفٍ ولوح
""""""""""""
آخر الموجز00نهاية عناويني
عسرني زماني (لعنبو) حظي اللي نام
أنا كيف أخاوي واحدٍ ما يدانيني
شكيت وبكيت وطحت من جور ها الأيام
ولا به رفيقٍ لي تنزل يواسيني
إلى قلت له أرفق.. يقول: الوعد قدام؟!
وفي مامضى من وقت أنت متحديني
أقوم أتعذر له.. وأحلف ثلاث أقسام
بأني ضريرٍ أبغي أحد يقديني!!
علام الدهر يا ناس ما يرحم المنضام؟!
يخلط الشقى.. والمر.. ( كوكتيل) يسقيني
يعادي وأسانع له.. وذاله ثلاث أعوام
أنا مكسبي منه السلامه ويكفيني!!
وأهديت له سبحه وعطرٍ (وطقم) أقلام
لعله يليّن جانبه لي ويرضيني
وساعة يدي والبوك و(الفرد) والأبوام
وعمري وما أملك.. رهنته بجرحيني
يقول ( إنثبر ) ! ما طاب لك يا (غبي) مادام
وذا اللي نخيته ما يفيدك مسيكيني
(تكوبعت) في همي وعضيت أنا الأبهام
وصرت أفتكر ذا الوقت وش به معاديني ؟
أشوفه يزيد الحزن.. والجرح.. والآلام
يقول إنت في طوعي!00 وقصده يبكيني
أثر ما مضى لي فلم !!..كله خدع وأوهام!
تفنن به المخرج وسلكه شراييني
وحطولهم حفلة وغنت بها ( أحلام)
يدقون طار الزار نشوى وفرحِيني
وقلبي على ( التورته) غدا بينهم أقسام
وشبو شموع (الفوز ) وحده وثنتيني
وصفوا هداياهم على الطاولة أكوام
شعوري.. وإحساسي ..وذاتٍ مشقيني
وصرت أتحسر ليه ؟ ! حظي عثر ماقام
ولوني( نهرته) صد عيا يحاكيني
ولملمت باقي ذكرياتي مع الأحلام
وفي آخر( الموجز) نهاية عناويني
""""""""""""
جرحـي قديـم وجـدده صـوت ورقــا
والقلـب سمـع (الراعبيـه) ولا طــاق
لا..ذعذعت.. لي ريحة (النـود).. شرقـا
تهـب بانسـام العشاشـيـق واشـتـاق
يسرقنـي التفكيـر ..والحلـم ..سـرقـا
والى صحيت بواقعـي.. طحـت منعـاق
طفلٍ حرق لـي مهجـة الجـوف حرقـا
أنتّـل الونـات مـن وسـط الأعـمـاق
فـي وسـط قلبـي لسعـةٍ منـه زرقـا
وفي وسط موق العيـن.. ماغيرهـا لاق
ياليـت جرحـه.. ينـتـداوى ويـرقـا!
أو ليت بعـده .. يـا مسلميـن ينطـاق
همـه يغنيـبـي عـلـى كــل طـرقـا
عـزاه ياقلـبٍ مـن البـيـن مـافـاق
هـذا يحـول بــه ..وهــذاك يـرقـا
والكون كله عقب هـاك الغضـي ضـاق
في بحر حبـه.. طاحـت النفـس غرقـا
ولا حصـل لـي منـه مابـلّ الأرمــاق
عقبـه فـلا والله فـي الغـيـد فـرقـا!
وما منهن إللـي بالتواصيـف تنسـاق!!
باطوي حبالي .. وانثر ( الدلو ) .. وارقا!
ماعـاد لـي شـفٍ بتلعـات الأعـنـاق!
فرقا ..عويـذا.. ياهـل الحـب فرقـا!!
منكم شربت المـر .. أشكـال.. وارنـاق
يـارب جيـت ودمعـة العيـن غـرقـا
تغفر لي ذنوبـي إلـى (قيـل مـن راق)
المـوت يـدرق تالـي العمـر.. درقــا
وياحسرتي لا (إلتفـت السـاق بالسـاق)
لاعـادِك الله يــوم الأثنـيـن ورقــا
القلب سمع صيـاح صوتـك ولاطـاق!!
""""""""""""
أثاري المشاعر ما تزيف ولا تنباع؟!
بوح الحقيقة يظهر السد والخافي
جلسنا أنا وياه جلست ألم.. وأوجاع
يشكي لي اللي جاه من وقته الجافي
ما زان له ( حظه) ..وحبه ..ولا الأوضاع
يقول الزمن يا كيف ياعد ولا يافي؟!!
تنتل به العبره وأنا القلب مني ماع
أقول السلامة زين لاصرت متعافي
يلد النظر يمي بعين تشع إشعاع
من الجور.. والحرمان.. واليأس.. يا كافي!!
يشكي لي ويبكي ومزع حشاي أمزاع
وأحرق يدي دمعٍ على الخد ذرافي
يقول أنت ماتفهم.. ولا تعرف الأسناع
وما ترحم اللي جاك يركض وهو حافي
جاني يذكرني بحبٍ قديم ضاع!
وشبك أخيراً جيت تشعل بي الطافي؟!
من بعد عمر فات منه ثلاث أرباع
عمر تعدى وراح قفى به القافي
وشريت به وأرخصت وبيع به البياع
مر شرابٍ (مر) ومر (عسل) صافي
وقت خذاه السيل وعدا به المطلاع
وغطى ربيع القلب( طبقٍ) من السافي
""""""""""""
قصيدة مسندة إلى المشرف العام على المنتدى00وإلى مستشاره الخاص / الشاعر سعد أبو حمد00
( مناسبتها أنني أعتذرت عن الإشراف على المنتدى الأدبي لظروف خاصة00فأبى أبو ريناد بتوصية من أبو حمد) فكتبت هذه المفردات0
[
موسى00 لك الله00 فكْ00 عنّي قيـودي=أنـا أسيـر عندكـم صـرت محـتـار
خوفوا00 إله 00الكون منشيء الرعودي=ربـي عليـم الحـال عـلام الأســرار
لا نيب بـوذيٍ 00ولا نـي00 يهـودي=مسلم وأصلي الفرض00 وعيدت الأفطار
ولانيب ( سيرلنكي) 00ترانـي سعـودي=بطاقتي00 بجيبي00 بها سيف وشعـار
إن كنت أنا مخطي .. فهاتو.. شهـودي=تثبـت دعاويـكـم بتوقـيـع وإقــرار
وأبي قضاةٍ عـدل 00 تعطـي عهـودي=وتصدر قرار الحكم 00صـارم00 وبتـار
و(المُلة) اللي صار00 (يحشاك)00 زودي=مافادني قربـه 00ولا ذيـك الأشعـار!!
مـن سبتـه غربـال قلبـي يـكـودي=جـدد جـروحٍ لـي00 قديمـات وكثـار
الله حسيبـي بس00ضـيـع جـهـودي=من عقب ما وصاك00 بدلتَ 00 الأفكـار
أنـا مسالـم طبـع مـانـي حـقـودي=وش لي بتدوير00 المشاكل00 والأخطار
أخشـى إلـى مـا طـق عـودٍ بعـودي=يقال خله عنـك 00سامـج00 وثرثـار
وإلا 00أبتلش لي00 مع سقيمٍ ..حسودي=يدفع على سـب.. الأجاويـد00 دينـار
ومثلك يا أبو ( ريناد) يوفـي الوعـودي=أوف00ّ بوعودك00 قبل قصاف الأعمـار
وتوبـة لكـم مـا عـاد والله أعــودي=ولا أجيكم كـود00 طرّقـي 00وخطّـار
هذي هـي القصـه وعطنـي الـردودي=أبغي قرار العفو يصدر 00بلا00 أعـذار
وقد تكرم الشاعر/ سعد أبو حمد بالرد بالقصيدة التالية
عود على الماضي وكثـر الـردودي=تظهر لك انوار الحقيقـه والاسـرار
هونك ترى مطلوب منـك الركـودي=خلك مع الذاري ليا هـب الاعصـار
غـلاك يالغالـي يزيـح الحـدودي=بيني وبينك ما بني سـور وجـدار
حاشاك ما يلحـق جنابـك نقـودي=ولا يضيّق خاطـرك صايـر ٍ صـار
منتب سريلانكي ولا مـن الهنـودي=من غير نقص في المسلمين الاخيار
اصلك عريق ٍ والفصل من جـدودي=من عزوة فيها الجدا سـر وجهـار
ومثلك عن حياض النشامـا يـذودي=وغيرك كثير الطهبلة كـذب وقمـار
و( المُله ) اللي في نظركم حسـودي=لك في صباحك والمسا ورد واذكـار
تكفيـك والا رقيـة الشـيـخ زودي=نركض نجيبه لك على حامي النـار
لولا غـلاك اللـي بقلبـي يـزودي=وتقدير ( ابو ريناد) من خلف الاستار
قلنا بـدال اللـي جفانـا جحـودي=عشرين من خيـرة بلدنـا وشعـار
ونو ٍ تلجلج فـي حشـاه الرعـودي=وخطاف برقه مزعج كـل الابصـار
يمكن يسوّي خبوب وسط النفـودي=والا يـزل ومـا تهنّـى بالامطـار
لوكان غيرك قلت طبعـك شـرودي=لكن حكيم قد سرت عنـك الاخبـار
بالطيب والشيمـه علينـا يجـودي=وجميله الغانـم بتعزيـز الاوصـار
وآقولهـا وآحـث لا زم تـعـودي=للمنتدى لو مـا تجـي فيـه ينهـار
*** سـعـد أبــو حـمـد***
الغالي00 وأبن العم/ الشاعر / إبراهيم سليمان المجلي السبيعي.... ( راعي البحرين) أبو راشد
كتب قصيدة في المنتدى يتشوق على مرات ويتوجد على شوفة الأهل والأحباب هذه أبياته الجميلة00
تـجــذبــنــي الـــذكــــرى[
أمس العصر مريت مـن طـارف كميـت=ديـرة أبـوي ودار عـرنـة جــدودي
ديرة بني عمي هـل السمـت والصيـت=ربعـي هـل الطـولات زيـن الأسـودي
ديـرة مـرات اللـي بسناهـا تماريـت=من عصر خالـد لـى زمـان السعـودي
فيهـا كـرامٍ بـك تهلـي إلـى جـيـت=اللـي لهـم مرقـى المراجـل صعـودي
هم عزوتـي لاعاسـم الوقـت وأبليـت=عزي سنـادي لـى تهـاوت عضـودي
ربعٍ إلى من طحـت قالـو لـي أعليـت=ملفـى هشاشيـل الـخـلا والفـهـودي
لى جيتهـم عانـي مـن البعـد وافيـت=ربـعٍ عـن سلـوم المكـارم تــذودي
ينصاهـم المضيـوم ومفـارق البـيـت=ريـفٍ إلـى مـن زاد شـح الحسـودي
عزي وعوني هـم إلـى لـذت وألجيـت=لى ضامنـي عسـر الزمـان النكـودي
ماقلـت شـيٍ فـي ثناهـم تهقـويـت=إلا الوكـاد اللـي روتــه الـوفـودي
جدني أنـا مبطـي مـن العـام ماجيـت=فكـري هواجيسـه تـشـط وتـعـودي
تجذبني الذكرى إلى اصبحـت وأمسيـت=تاريـخ مـجـدٍ سطـرتـه الشـهـودي
واليـوم عنّـت لـي الذكـرى وعنيـت=ركبـي جـداهـم أستحـثـه بــزودي
سـلام يـادارٍ لهـا فـهـت وأثنـيـت=مالعلـع الجمـري بـروس الفـنـودي
**** إبراهيم سليمـان السبيعـي***
""""""""""""
"""""""
وقد كتبت له هذه المفردات شكراً وتقديراً لمشاعره الصادقة0
زان المثل في خاطـري واسفهليـت=وا بديت أنا شوقي وعاطـر ردودي
للصاحب الي خص ربعه هل (كميت)=بأبيـات جزلـه ماعليهـا نقـودي
من طيب ساسه يالنشامى تقهويـت=وأخذت أنا شفي.. ورَوّيت عـودي
ياراعي البحرين ..ياعالي الصيـت=يالـي غلاكـم بالضمايـر يـزودي
قطفت من زاهـر كرمكـم وشميـت=ريحٍ يشادي فـوح مسـكٍ وعـودي
أنا أشهد إنـك بالمراجـل تماديـت=فعلك.. وطيبك.. راقيٍ بك سنـودي
وأنا أشهد إنك في المعالـي تعليـت=تدّرك بجاهـك كـل علـمٍ يكـودي
راعي ( قلالي)1 مرحبابك وحٍييـت=انتا لنـا يمنـىً وحنـا العضـودي
شامـخ بفعلـك يافتـى ماترديـت=ياشوق ضافية الستـر والجعـودي
ياليت ربي يجمـع الشمـل ياليـت=من قبل ماتطوى علينـا اللحـودي
تكفى (يا بو راشد) نبي تبني البيت=في ديرة أعمامك.. مقـر الجـدودي
وإليا إجتمع شمل القرايـب تهنيـت=جمع الشمل يسوى جميع الوجـودي
إلى ذكرت عصـور اهلنـا تأذيـت=يشب في صدري سـواة الوقـودي
وقـتٍ فـلا والله مثلـه تمـاريـت=وقت عليهم (يابن عمي) جحـودي
وقتٍ يشتت جمع الأخـوان تشتيـت=في دُورة العيشة تعـدوا الحـدودي
ومن يوم ربي سخر القار والزيـت=نحمد ولي العرش صارت مهـودي
نعيش في الدنيـا علـى ماتمنيـت=طير السعد غرد على كـل عـودي
يا الله يامن فـوق عرشـك تعليـت=إنك تديم الخيـر عهـد السعـودي
ومنك العذر كاني بقولـي تماديـت=لاشـك ولهـانٍ وباحـت سـدودي
ولك التحية عد من طـاف بالبيـت=وعد الحصى وإعداد رمل النفـودي
أحبتي 000أتمنى أن تستلطفو نبض هذه الحروف000
وهي تتحدث بأسم من قرأها000
هيجَنَ القاف بهجوسي وسبقتني له يدي
ترسم دموع القوافي عمرٍ أقفى مركبه
لاهبٍ بأقصى ضميري حاديٍ قلبي حدي
عاديات الوقت الأقشر قصصت طول شنبه
شاردٍ من جور بقعى.. مبعدٍ عنها يعدي
لين عجز!.. وطاح يزحف فوق مثني ركبه
لو ملكت الكون كله.. والكواكب.. والجدي
ماتساوي دون وجهي وجبةٍ في مسغبه !!
أحمد الله في المراجل .. باذلٍ كل جهدي
أتبع اللي فيه عزي.. منكبي في منكبه
ماتعلمت الدناوة00ولّ ياولد الردي
ياعسى الله يحرم اللي ما يقدم مزهبه
المعالي في حياتي دوم فرحي وسعدي
تاركٍ درب السماجه للحصيني وعنبه
ومن دعاني للخيَابة .. قلت ما أسمع يابعدي
تابعٍ ملة ( نبيي ) مذهبي من مذهبه
وسلامتكم
راعي مرات ماشاء الله عليه قصائده كثيرة
منها مانزل
في موقع العائلة آل مجلي ومواقع القبيلة سبيع الغلبا ومنها مانزل في الفيس بوك ومنها مانزل في التويتر ومنها لم ينزل في ذلك وإنما عبر وسائل الإتصال رسائل الجوال
وأتمنى أن تنال على إعجابكم مع خالص شكري للجميع
العرض العادي
