الأخوان الطيبين
والأخوات الطيبات
وأحبابي المشاهدين
الله مير يحييكم ويعطيكم العافية
عسى ماخلاف ولامخالف
هذا سلمكم الله وسلمني ولد ولدي يروي لي قصة حدثت له صباح اليوم ومثل ماتعرفون ومعكم علم
الناس صايمة وكل واحد نفسه على راس خشمه مايمديك بس تعطس إلا وماتدري من أنت بيده
يقول ولد ولدي اللي أنا جده كنت رايح لعملي كالعادة وأنت تعرف ياجدي إن الزحمة بالرياض
حدث ولاحرج لاشوارع زينة ولامخارج متوفرة بس ندرعم مع هالسكيك وهالعالم الله لايوريك
هاجين تقل غنم شايفه لها ذيب والمرور ماعندك أحد يطالع وكنه مايطالع
يقول مير مافيه إلا قطع بهاالإشارات والمسكين اللي نظامي هو اللي يروح فيها أكيد بتقولون ليش ؟
لأن المسكين متقيد بالأنظمة والقوانين ومحافظ على نفسه قبل غيره بالعربي إنسان واعي حضاري
ماهو مثل بعض ربعنا يقول تولع الإشارة وإلا ماتولع تطفي وإلا ماتطفي قاطعين قاطعين الله لايعوق
حتى الأجانب خذوا ربوتنا وخذوا طبعنا مافيه إلا قطع والمرور يتفرج تحسبه سوا شي ماغير يقلب هالراس
يمين يسار ومسوي نفسه ماشاف شي يقول يوم شاف الفوضى وهالعالم رادين به ومابهم حيلة تدري
وش سوا ياجدي قلت له وش سوا قال ياجدي ركب الدورية وهج حاط رجله وخلانا بورطة وبلشة
قلت له وأنا جدك هذولا أولاً يبيلهم تدريب وحسن تصرف على الأمور العصيبة مهوب بس يوم شاف
الناس ماإهتموا به حط رجله ومشى وبعدين لاتلومه جندي والضابط مادرى في آخر نومه ولادرى
عن أحد وإلا قطع الإشارة سهل في البلدان الأخرى ولاتروح بعيد خلنا في الخليج عندك قريب
مافيه إلا إنضباط وإحترام للأنظمة والقوانين نادر ماتشوف رجل مرور عند الإشارة أكيد بتقولون ليش ؟
لأن الوعي أهم الأشياء لديهم ومافيه خربط بربط أماعندنا وأنا جدك المرور جيد وشو به جيد بالتخشش
تحت هالكباري تقل خايفين ويالله مافيه إلا رصد السرعة وسجل مخالفة
وإلا ماتدري وأنت واقف عند الإشارة إلا وهو زارقك بين هالسيارات تقل جني أعوذ بالله وبيده تفتر وقلم
وياويلك إذا ماأنت رابط الحزام وهذا كل همهم أكيد بتقولون ليش ؟
علشان يحررون عليك مخالفة أما تبيهم ينظمون السير وإلا يفكرون بالإسلوب الحضاري وردع كل مستهتر
بالأنظمة هذا يبي له وقت متى ؟ ماأدري
بالعربي المرور نيم على هالصبحية
وسلامتك وسلامة ولد ولدي
وسلامة
عاشق نجد
العرض الشجري
