بدوية وتحضرت

كانـت أول يـوم بالأصـل بدويه=حملها حمـل علـى غيـره كبيـر
حملها كايـد ولاهـي بـه رديـه=تعتزم وتقـول خيـر والـف خيـر
قبل مايظهر شعاع الشمـس حيـه=ابتدت مشوارها الصعـب العسيـر
نارها شبـة وصاجـه فـي يديـه=ومن عجينتها على صاجـه تديـر
وعقب ماخلص فطور اهل الحميـه=روحت يـم الغنـم تعلّـف شعيـر
وأوردتها الماء على جـال الركيـه=دلوها فوق السوانـي لـه صريـر
وشدت المحـزم وصاحـت للرعيـه=واقتفتهـا للمـراعـي والغـديـر
حافيه وعصابتـه عشريـن طيـه=وللحطب فاروعها سيـف شطيـر
ومع غروب الشمس عادت شوشليه=والحطب فوق الجحش كبر البعيـر
وأبتدت ترضـع بهمهـا الاجوديـه=من كبير الضـان تطلـب للصغيـر
وانقلـب حـال بدويتنـا حضريـه=واختلف طبعه عـن اولهـا كثيـر
حملها فـي حملهـا دايـم هنيـه=من عسير الحمـل بـدل باليسيـر
عقب ماأسمه مع الرحـل صخيـه=اصبح اسمه من عقب هـذا عبيـر
عقب ماثوبه علـى دور الضحيـه=صار بالموضـه لهـا دور خطيـر
عقب ماهي بالغنم صبـح وعشيـه=صارت بسوق الذهب بس تستديـر
عقـب مالبرقـع يزيـّن هالبنيـه=النقاب اصبـح لهـا مثـل الخفيـر
عقب ماهي مع صلاة الصبح حيـه=الظهر يذن وهـي تعـزف شخيـر
من عقب مانومها بـأرض خليـه=امرحت فـي غرفـة كلـه حريـر
من عقب ماهـي بعيشتهـا شقيـه=الخـدم قالولهـا بأمـرك نطـيـر
تامـر وتنهـا ومطلبهـا هـديـه=وهي على المركاء مثل زول المدير

الشاعر / مضحي الشيبان

 

ابوخالد صح لسانك ولسان الشاعر مضحي

 

الله يردها على بهمها

مثل ما قالوا بعض بني مرة عندما زاروا ابنتهم هويده بعدما تزوجت الملك عبدالعزيز /

يالله يالي حط لهويده بيت ********* إنك ترد هويديه في غنمها



تسلم يا بوخالد
وصح لسان الشاعر

 

صح بدنك اخوي ولد بداح
وتشرفت بمرورك الكريم
لك خالص التحية

 

أخوي فهد
صح بدنك
وما أظن من ( تمرغ ) بالحضارة سيعود لسابق عهده
حبي وتقديري لك على مرورك الكريم

 

صح لسان مضحى , وصح لسانك بوخالد , مسكينه هاالبدويه خلها يامضحى ترتاح واتهنى وشبقى فى البداوه حتى الغنم تعطيها شعير وراحت ايام العشب والبداوه يامضحى , خل بنات البدو يتهنون ويرتاحون ولاتحسدهم على النعمه .

 

محمد القباني

صح لسانك ولسان الشاعر

وياليت الحضاره اثرت بس على النساء بل اثرت على الرجال

الكل منا يعرف اناس كثير تغيرو وتنكرو للماضيهم في البداوه بكل بجاحه وقوة عين

بعد انكان يرضع الصخال ويشمل الغنم ويركب الحمير والجمال

حتا انك لو ذكرتهو بماضيه لأرعد وأزبد وأنكر ذالك وأقام الدنيا وأقعدها

(((وصاحب المثل يقـول))) الي مــاله اول ماله تالــــــــــــي

 

الغالي حد الرهيف
مشكور مرورك جميل
رعاك الله لك الود والتقدير

 

صح بدنك العروان
والشاعر علي القحطاني يقول

يا من سكن بوظبي وسط الإمارات=أنا عشيري عندكم يسكن العين
بعيد عني ما تهياء الزيارات=وإن كان زرته يوم من بعد شهرين
البدو شالتهم علينا الحضارات=وأنا الحضارة بعدت عني الزين

فلا غرابة بأن البادية يستوطنون والملك عبدالعزيز طيب الله ثراه سعى لتوطين البادية
وبالتأكيد عندما يستوطنون لا بد من تغييرات فيهم من الناحية الإجتماعية والسلوكية
ومواكبة ركب الحضارة أسوة بالآخرين
لك التحية على مرورك